MICS - TUsF - Myanmar

ခွဲစိတ်ခန်းသုံးပစ္စည်းဖိုးကအစ တောင်းပြီးမှကုပေးသည့် မန္တလေးလူမှုဖူလုံရေးဆေးရုံအုပ်နှင့် တာဝန်ရှိသူများ၏ လုပ်ရပ် အလုပ်သမားများ ဝေဖန်

မတ် ၁၃ ရက်
The Justice Wave

မန္တလေးတိုင်းဒေသကြီး၊ အောင်မြေသာစံမြို့နယ်ရှိ အလုပ်သမားများအတွက် လူမှုဖူလုံရေး အကျိုးခံစားခွင့်နှင့် ကုသခွင့်ပေးရန် ရည်ရွယ်ဖွင့်လှစ်ထားသော လူမှုဖူလုံရေးဆေးရုံ (အလုပ်သမားဆေးရုံကြီး) တွင် ဆေးရုံအုပ်အပါအဝင် တာဝန်ရှိသူအချို့က အလုပ်သမားများထံမှ နည်းမျိုးစုံဖြင့် အဓမ္မငွေကြေးတောင်းခံမှုများ ပြုလုပ်နေကြောင်း နစ်နာသူအလုပ်သမားများ၏ ပြောဆိုချက်အရ သိရသည်။

အလုပ်သမားများအနေဖြင့် မိမိတို့လစာ၏ ၂ ရာခိုင်နှုန်းနှင့် အလုပ်ရှင်ဘက်မှ ၃ ရာခိုင်နှုန်း စုစုပေါင်း ၅ ရာခိုင်နှုန်းကို လူမှုဖူလုံရေးကြေးအဖြစ် လစဉ်ပေးသွင်းနေရပြီး ကျန်းမာရေးနှင့် အလုပ်လက်မဲ့အာမခံအတွက် လူမှုဖူလုံရေးကတ် (Smart Card) ပြရုံဖြင့် အခမဲ့ကုသခွင့်ရရှိရမည်ဖြစ်သော်လည်း လက်တွေ့တွင်မူ ငွေကြေးအမြောက်အမြား ပေးဆောင်နေရသည်ဟု ဆိုသည်။

အဆိုပါဆေးရုံတွင် ဆေးရုံစတက်သည်နှင့် တစ်ပြိုင်နက် ငွေကျပ် ၅ သောင်းခန့်ကို အကြောင်းပြချက်မရှိဘဲ ကြိုတင်တောင်းခံလေ့ရှိကြောင်း သိရသည်။ ထို့အပြင် ခွဲစိတ်ကုသမှုခံယူရန် လိုအပ်လာပါက ခွဲစိတ်ခန်းသုံးပစ္စည်းများဖြစ်သည့် ချုပ်ကြိုး၊ ဂွမ်း၊ ပတ်တီး၊ ထုံဆေးနှင့် ဆေးထိုးအပ်များအပြင် ဆေးရုံက ထောက်ပံ့ပေးရမည့် ဆေးဝါးများကိုပါ အလုပ်သမားများက ကိုယ်တိုင်ဝယ်ယူနေရသည့်အပြင် ငွေကြေးပါ ထပ်မံတောင်းခံနေခြင်းဖြစ်သည်။

"အကြီးစားခွဲစိတ်မှုဆိုရင် ဆေးရုံအုပ်က ၁၀ သိန်းလောက်အထိ တောင်းပါတယ်။ ညှိနှိုင်းရင်တောင် အနည်းဆုံး ၇ သိန်းလောက် ပေးရတယ်။ ခွဲစိတ်မှုတိုင်းအတွက် ပိုက်ဆံမပေးရင် မလုပ်ပေးသလိုမျိုး လုပ်နေတာပါ" ဟု နစ်နာသူ အလုပ်သမားတစ်ဦးက ပြောသည်။

ထို့အပြင် ခွဲစိတ်မှုများကို ကျွမ်းကျင်ဆရာဝန်ကြီးများကိုယ်တိုင် မလုပ်ဆောင်ဘဲ လက်သင်ဆရာဝန်များဖြင့်သာ လုပ်ဆောင်ခိုင်းမှုများရှိနေသဖြင့် အလုပ်သမားများ၏ အသက်အန္တရာယ်အတွက်ပါ စိုးရိမ်နေရကြောင်း သိရသည်။

အလုပ်သမားများ၏ ပြောပြချက်အရ အောင်မြေသာစံမြို့နယ်အပါအဝင် မြို့နယ်သုံးခုမှ လူမှုဖူလုံရေးတာဝန်ခံများသည် ဆေးရုံအတွင်း ဖြစ်ပွားနေသည့် ယင်းကဲ့သို့ ငွေကြေးတောင်းခံမှုများကို သိရှိသော်လည်း တိုင်ကြားလာပါက ဖြေရှင်းပေးခြင်းမရှိဘဲ ခေါင်းရှောင်နေကြကြောင်း သိရသည်။

"လူမှုဖူလုံရေးရုံးကို သွားပြောရင်လည်း ဆေးရုံနဲ့မဆိုင်သလိုလို၊ သူတို့နဲ့မဆိုင်သလိုလိုနဲ့ ရှောင်နေကြတယ်။ အလုပ်သမားတွေမှာတော့ လစဉ်ကြေးလည်း ပေးရသေးတယ်၊ တကယ့်တကယ် ဆေးရုံတက်တော့လည်း အပြင်ဆေးခန်းထက်တောင် ပိုကုန်နေရတယ်" ဟု MICS မှအထွေထွေအတွင်းရေးမှူးချုပ် ကိုသက်နှင်းအောင်က The Justice Wave သတင်းဌာနကိုပြောပါတယ်။

လက်ရှိတွင် အဆိုပါလူမှုဖူလုံရေးဆေးရုံ၌ အစိုးရမှ ထုတ်ပေးထားသော ဆေးဝါးများ ပြတ်လပ်နေသည်ဟု အကြောင်းပြကာ အပြင်ဆေးဆိုင်များတွင်သာ ဈေးကြီးပေးဝယ်ခိုင်းနေခြင်း၊ လူမှုဖူလုံရေး အကျိုးခံစားခွင့် လျော်ကြေးငွေများ ထုတ်ယူရာတွင်လည်း ကြန့်ကြာအောင် ပြုလုပ်ခြင်းနှင့် လာဘ်ငွေတောင်းခြင်းများကိုပါ ကြုံတွေ့နေရကြောင်း သတင်းရရှိပါသည်။


#မန္တလေးလူမှူဖူလုံရေးဆေးရုံ

To mark International Women’s Day, which falls today, we briefly held a discussion session from 10:00 a.m. to 12:00 noon.
During the session, we exchanged views on the difficulties faced by the women who attended, the activities of MICS, and the provisions of the International Labour Organization (ILO) relating
https://www.facebook.com/share/p/1CMdYJ9FeP/