The Macau Post Daily

點解唔連任？「好攰！」

3年抗疫2年拼經濟，
仲有1個月就卸任嘅行政長官賀一誠，
自從用書面話：
「因健康理由唔競選連任」後，
喺（19日）上完立法會，
總結了過去1年，
又回顧了過去5年嘅工作，
再讀埋同繼任人岑浩輝商討後有共識嘅：
「明年財算案排」，
終於可以再坐喺政總，
同記者見面⋯⋯回答問題。

大家嘅問題，
除咗問多次賀特首點睇呢5年成績，
就係關心佢嘅健康、5年感受同卸任後有咩打算？

賀特首話，
相信大家都睇到佢清減咗，
呢個係身體原因。
一來因年紀唔輕，
又因喺做長官期間，
壓力大，
上任無幾耐就係疫情，
同班司長𡚒力應對，
晚晚瞓得3～4個鐘。
就算疫後呢2年，
又要拼經濟，
佢同羅司長年紀最大，
所以睡眠恢復得無咁好。

到今年年頭，
大家問佢「連唔連任」都無回應著，
因為感到身體好似有D唔妥⋯⋯
直到今年中，
接見埋香港傳媒訪問團時，
都同佢哋講咗句「感覺就係好攰！」

之後一體檢，
身體果然出咗問題。
現在恢復得算唔錯，
比起之前，
「有返D中氣⋯⋯所以今天點都見下大家。」
至於卸任後做咩？
賀特首話，
最重要係恢復健康嘅身體。
自己喺澳門出生，
澳門長大嘅澳門人，
都想睇到澳門成功。
而且咁多年個人習慣同責任感，
將來無論用咩身份，
都會為澳門發展貢獻力量，
拼盡全力。

咁今次會唔會係佢做特首「最後一次見記者」？
賀特首話，
仲有成個月，
唔敢講係咪最後一次。
如果有事發生或宣佈，
都會見記者。

佢又話，
任內無做過妨礙新聞或言論自由嘅事，
相反一直致力保障言論自由空間，
有意見或批評，
佢哋從來無反駁或禁止，
只係真有「誤導資訊」出現時，
發個「正確訊息」。

咁做咗5年自己點評分？
賀特首話，
佢同團隊都竭盡所能，
內部檢查報告，
喺競選時承諾嘅政綱，
即使上任幾天就遇上疫情，
抗疫3年拼經濟2年，
但仍基本全部「目標達成」。

值幾多分？
呢個就交俾市民去評價！

#賀一誠 #好攰 #抗疫 #連任 #健康 #拼經濟 #目標達成

第56屆澳門格蘭披治電單車大賽終登場

第一日受颱風影響取消

第二日因為賽事嚴重超時
賽會為保障車手安全
亦都宣佈將練習賽取消
導致原本為賽事打響頭炮嘅格電
喺賽事嘅第三日（今日）先出場

喺澳門八次舉起格電冠軍嘅「老手」路達
率先喺自由練習賽攞到最快圈速

而上屆冠軍赫爾文就排第六
喺之後嘅排位賽中
排第一位嘅係25號戰車嘅陶德
第二位係來自芬蘭嘅哥達摩
大熱赫爾文排第三
衝擊第九嗰冠軍嘅路達排第四

今次練習時間少咗咁多
對一眾車手尼講都係一大挑戰
聽日最後一個比賽日
格電係第一場比賽
到底邊個可以坐上第56屆澳門格蘭披治電單車大賽嘅冠軍寶座
聽朝就知！

#格電 #路達 #天雨 #赫爾文 #陶德 #哥達摩

外判公司明目張膽呃政府⋯⋯？！

市民都睇唔過眼，
話哂都喺大街大巷，
仲係俾人認路嘅「名牌」！

所以近日就有網民，
Po咗啲「甩皮甩骨」嘅街道名牌出嚟，
仲留言話：
「澳門大醜聞、做假做到天大笑話」
又話：
「判俾呢啲公司明顯唔識啦、陽光工程見光死⋯⋯。」

市政署（12日）傍晚即發新聞稿回應，
話佢哋嘅人喺巡查期間，
發現1批新更換街道名牌，
「存在質量問題」。

經檢查發現，
同要求嘅製造工藝「不符」，
疑涉欺詐，
已報警追究。

市署重申，
一直對轄下工程質量嚴格把關，
絕不容忍外判公司存在欺詐行為。

又強調，
市政署密切跟進事件，
若涉人員疏忽或其他不當行為，
將開展內部紀律程序。

市署又話，
鑑於有部份街道名牌因日曬雨淋等原因，
出現唔同程度嘅損毀，
市政署近月對當中約400個街道名牌「進行更換」，
呢啲工程「仍未驗收」。

又話，
按工程文件規定，
街道名牌須用「釉下彩」方法製造，
更明確列明「釉下彩」製法，
須遵守工藝規則。

不過，
市政署人員喺巡查時發現，
近日呢批新安裝街道名牌，
出現「嚴重質量」問題，
街道名稱並非按工藝要求用「釉下彩」燒成，
存在「偷工減料」嘅嫌疑。

對於出現質量問題嘅街道名牌，
市署將儘快採取措施進行更換。

#市政署 #街道名牌 #釉下彩 #偷工減料 #嫌疑 #追究 #報警