Colordrop

ނަސްރުގެ ދުވަހުގެ ގޮތުގައި މިދުވަސް ފާހަގަކުރެވެނީ 1988 ވަނަ އަހަރުގެ ނޮވެމްބަރު މަހުގެ 3 ވަނަ ދުވަހު ދިވެހިރާއްޖެއަށް ކުރިމަތިވި ޢުދުވާނުން ދިވެހީންނަށް ނަޞްރު ލިބުމާ ގުޅިގެންނެވެ.
ޢަބްދުﷲ ލުތުފީ އިސްވެ ހުރެ ދިވެހީންގެ މަދު ބަޔަކު، ސުރީލަންކާގެ ޓެރަރިސްޓް ޖަމާޢަތެއް ކަމަށްވާ ޕީޕަލްސް ލިބަރޭޝަން އޯގަނައިޒޭޝަން އޮފް ޓެމިލް އީލާމް (ޕްލޯޓް) ޖަމާޢަތާ ގުޅިގެން 1988 ވަނަ އަހަރުގެ ނޮވެމްބަރު މަހުގެ 3 ވަނަ ދުވަހުގެ މާލެއަށް ދިން ހަމަލާއަކީ ރައީސް އަލްއުސްތާޛު މައުމޫން ޢަބްދުލް ޤައްޔޫމްގެ ވެރިކަން ނިމުމަކަށް ގެނައުމަށް ދިން ހަމަލާއެކެވެ. މި ހަމަލާ ނާކާމިޔާބުކޮށްލުމުގެ އެންމެ އިސް ދައުރެއް އަދާކުރެއްވި ބަޠަލަކީ ޝަހީދު ކޯޕްރަލް ޙުސެއިން އާދަމެވެ. ދިވެހީންގެ ތެރެއިން ގިނަ ބަޔަކަށް އެކި ވަރުގެ އަނިޔާ ލިބި، ސިފައިންގެ ތެރެއިން 8 ބޭކަލަކާ އާންމުންގެ ތެރެއިން 11 މީހުން ޝަހީދުވެގެން ދިޔައެވެ. އާންމުންގެ ތެރެއިން ޝަހީދުވި 11 މީހުންގެ މީހުންގެ ތެރެއިން ބައެއް މީހުން ޝަހީދުވެގެން ދިޔައީ ދުޝްމަނުން ފިލުމަށް ޓަކައި ރަހީނުކޮށްގެން ގެންދިޔަ ބޯޓުގައެވެ. ރަހީނުކުރި މީހުންގެ ތެރޭގައި އޭރު ރާއްޖޭގެ މަތީ މަގާމުތަކުގައި ތިއްބެވި ބޭފުޅުން ހިމެނެއެވެ.