Anil Rungta

धन्यवाद, सबै–सबैलाई!

पर्सा निर्वाचन क्षेत्र नं. १ बाट प्रतिनिधिसभा सदस्य पदमा निर्वाचित हुनु भएका हरि पन्त जी लाई हार्दिक बधाई तथा सफल कार्यकालको शुभकामना व्यक्त गर्दछु।

यहाँका मतदाताज्यूहरुबाट प्राप्त जनादेशलाई म सम्मानका साथ स्वीकार गर्दछु। निर्वाचनको परिणाम जे भए पनि, जनताको सेवा गर्ने मेरो संकल्प र प्रतिबद्धता कहिल्यै कमजोर हुने छैन।

यो निर्वाचन अभियानका क्रममा मैले यहाँका जनताबाट अपार माया, विश्वास र समर्थन पाएको अनुभूति गरेको छु। यसले मलाई अझ बढी जिम्मेवार बनाएको छ। म यस यात्रालाई जनताको सेवामा अझ दृढताका साथ अघि बढ्ने नयाँ सुरुवातको रूपमा लिएको छु।

राजनीति मेरो लागि पद वा हारजितको विषय मात्र होइन, यो जनताको आशा, विश्वास र भविष्यसँग जोडिएको दायित्व हो। त्यसैले म समग्र पर्साको विकास, समृद्धि, समुन्नति र यहाँका जनताको हक–हितका लागि निरन्तर रूपमा सक्रिय रहनेछु।

म पर्साको यही माटोको सन्तान हुँ, र यही माटो तथा यहाँका जनताको सेवा गर्नु नै मेरो कर्तव्य हो। तपाईंहरूको साथ, विश्वास र प्रेरणाले मलाई सधैं अगाडि बढ्न ऊर्जा दिनेछ। म सदैव जनताको बीचमा रहनेछु, जनताको आवाज बन्ने प्रयास गर्नेछु, र पर्साको उज्ज्वल भविष्यका लागि आफ्नो तर्फबाट निरन्तर योगदान दिइरहनेछु।

यस अभियानमा साथ दिने सम्पूर्ण मतदाता, समर्थक, शुभेच्छुक तथा साथीहरूलाई हार्दिक धन्यवाद व्यक्त गर्दछु।