Panta Literary Blog

समय सान्दर्भिक महात्म्य

१. विद्यार्थी बिहानभरि सुत्छ :
परिवार भन्छ: सुतोस्, उठाइदिनु हुँदैन, उसको भावनामा चोट पुग्छ ।
२. उसले होमवर्क गरेन :
अभिभावक भन्छ : सर ! आज यसले होमवर्क गरेको/ गरेकी छैन, दवाव नदिनुहोला, उसको भावनामा चोट पुग्छ ।
३. विद्यार्थी झम्लङ्ग कपाल पालेर, ट्याटु खोपेर, बहुरूपी भएर स्कूल पुग्छ :
अभिभावक भन्छ: यसलाई केही नभन्नुहोला, उसको भावनामा चोट पुग्छ।
४. विद्यार्थीले चुरोट तान्न सिकेको छ, गाँजा खान सिकेको छ, जाँडरक्सी खाएर सडकमा लम्पसार भेटिन्छ, हुक्का र गाँजा बोकेर स्कूल जान्छ । ऊ यो सबै सिकाउने 'गुरु' को 'आज्ञाकारी विद्यार्थी ' बनिसकेको हुन्छ । शिक्षक अभिभावकको साथ खोज्छ :
अभिभावक भन्छ : उसले होइन भनेको छ , उसलाई केही भन्नुहोला, उसको भावनामा चोट पुग्छ ।
५. विद्यार्थी चार, पाँच कक्षादेखि लभको चक्करमा हुन्छ । कक्षाकोठा, सार्वजनिक यातायात, शौचालय, भर्याङ सबैतिर ऊ अश्लिल हर्कत गरिरहेको हुन्छ । क्रस, ब्रेकअप, प्याचअप, डेटिङ... अनेक जानेको छ उसले ।
अभिभावक भन्छ : ऊ त्यस्तो छैन, यो उमेरमा अलिअलि त भैहाल्छ, उसलाई केही नभन्नुहोला, उसको भावनामा चोट पुग्छ ।
६. विद्यार्थीसँग आइफोन छ, ल्यापटप छ, ट्याब छ । ऊ रातभरि अनलाइन हुन्छ, फ्रिफायर, पब्जी खेल्छ, को कोहोसँग अनलाइन च्याट गरेर वा के केको हो भिडियो हेरेर रात बिताउँछ, दिउँसो स्कूल आएपछि टाउको दुख्यो भनेर टेबलमा निदाउँछ । आँखा सधैँ राता, मान्छे सधैँ झुम्म, शिक्षक सुधारको प्रयास गर्छ :
अभिभावक भन्छ : यसलाई केही नभन्नुहोला, उसको भावनामा चोट पुग्छ ।
७. विद्यार्थीको पाखुराभरि ब्लेडले चिरेको डाम छ, ऊ कक्षामा टोलाएर एउटैलाई हेरिरहन्छ, अरू सप्पै उसलाई र उसले हेरेकोलाई हेरिरहन्छन् । शिक्षकले सप्पै बुझेको छ । अभिभावकसँग सहयोग माग्छ :
अभिभावक भन्छ : उसलाई केही नभन्नुहोला, उसको भावनामा चोट पुग्छ ।
८. कहिलेकाहीँ होमवर्क बुझाइहाल्यो भने अलि जान्ने साथीले गरेको होमवर्क सारेर बुझाउँछ, शिक्षकले आफैँ गर भनेर दवाव दिन्छ :
अभिभावक भन्छ : उसलाई केही नभन्नुहोला, उसको भावनामा चोट पुग्छ ।
९. विद्यार्थी कापीकलम लिएर जाँदैन । शिक्षक 'कापी कलम खोइ ?' भन्छ ।
अभिभावक भन्छ : नमाग्नोस्, उसको भावनामा चोट पुग्छ।
समाज भन्छ : टर्चर दिन पाइँदैन, उसको भावनामा चोट पुग्छ।
प्रेस भन्छ : मानव अधिकारको गम्भीर उलंघन भयो ।
युट्युबर भन्छ : यो ज्यादती कहिले सम्म ? उसको भावनामा चोट पुग्यो ।
१०. स्कूल अभिभावक बोलाउँछ । विद्यार्थी 'आउने हैन नि' भनेर आँखा तर्दिन्छ ।
अभिभावक भन्छ: जान्न, उसको भावनामा चोट पुग्छ।
११. स्कूलले परीक्षा लिन्छ ।
अभिभावक भन्छ : चार जिपिएभन्दा कम नदिनोस्, उसको भावनामा चोट पुग्छ।
१२. बोर्डले परीक्षा लिन्छ । ऊ उत्तीर्ण हुँदैन।
कथित बुद्धिजीवी भन्छ : परीक्षा खारेज हुनुपर्छ, नत्र उसको भावनामा चोट पुग्छ।
अभिभावक भन्छ : ऊ अनुत्तीर्ण हुनै मिल्दैनथ्यो, उसको भावनामा चोट पुग्यो।
समाज भन्छ : अनुत्तीर्ण भन्न मिल्दैन, उसको भावनामा चोट पुग्छ।
अनि माथिका सप्पैले एकैचोटि भन्छन् : यी शिक्षकले पढाएनन् । सबैलाई पास गराएनन्। यिनलाई कारबाही हुनुपर्छ ।
************************
अँ साँच्ची, शिक्षकको चाहिँ भावना हुँदैन है !
*************************
कुनै व्यक्ति विशेषमा लक्षित छैन । शिक्षकहरूको औषत भोगाइ र अनुभूति मात्र हो । कसैको ब्यक्तिगत जीवनसँग मिलेमा संयोग मात्र हुनेछ ।