BulakeNews

ICC WARRANT VS. SEN. BATO?

Umani ng matinding reaksiyon online at sa mundo ng politika ang ulat na umano’y naglabas na ng warrant of arrest ang International Criminal Court (ICC) laban kay Ronald dela Rosa kaugnay ng imbestigasyon sa kontrobersyal na drug war ng nakaraang administrasyon.

Batay sa ilang ulat at sources na binanggit ng News5, sinasabing kabilang si Sen. Bato sa mga pinangalanan noon ng ICC bilang umano’y “co-perpetrator” o kasabwat sa anti-drug campaign ni dating Pangulong Rodrigo Duterte.

Gayunman, nilinaw naman ng Department of Justice at Department of the Interior and Local Government na wala pa silang natatanggap na opisyal na komunikasyon o kumpirmasyon hinggil sa umano’y warrant of arrest mula sa ICC.

Patuloy namang pinag-uusapan online ang isyu, lalo na matapos maiugnay muli ang pangalan ni Sen. Bato sa drug war investigation na matagal nang tinututukan ng international tribunal sa The Hague, Netherlands.

PAGKUHA NG CELLPHONE SA CANTEEN, NAHULI SA CCTV

Nag-viral online ang isang insidente sa San Jose del Monte, Bulacan matapos mahuli sa CCTV ang umano’y pagkuha ng cellphone sa loob ng isang canteen. Sa kuha ng surveillance camera, makikita ang kilos ng suspek habang palihim umanong tinitingnan ang paligid bago tuluyang mawala ang cellphone ng may-ari.

Ayon sa ulat, iniwan lamang sandali ng biktima ang kanyang cellphone sa mesa habang abala sa loob ng establisimyento. Ilang minuto lamang ang lumipas ay napansin na nitong nawawala ang gadget dahilan upang agad nilang balikan ang CCTV footage ng canteen.

Sa video na kumalat sa social media, makikitang maingat na kumilos ang suspek bago mabilis na umalis sa lugar matapos makuha ang cellphone. Dahil dito, marami ang nagpaalala sa publiko na maging mas maingat sa kanilang mga personal na gamit lalo na sa mga pampublikong lugar.

Patuloy namang nakikipag-ugnayan ang may-ari ng establisimyento sa mga awtoridad upang matukoy ang pagkakakilanlan ng suspek at maibalik ang nawawalang cellphone ng biktima.

SK CHAIRMAN SA BIÑAN LAGUNA, MAY WARRANT OF ARREST SA KASONG R**E

Inilabas ng Regional Trial Court (RTC) Branch 121 sa Meycauayan City, Bulacan ang isang warrant of arrest laban sa isang lalaki na kinilalang si John Lloyd L. Ludrin, na sinasabing nagsisilbing SK Chairman sa kanilang barangay sa Biñan, Laguna.

Batay sa inilabas na Warrant of Arrest na may petsang Mayo 6, 2026, nahaharap ang akusado sa kasong “Rape (Sexual Assault) in relation to R.A. 7610” o ang batas na nagbibigay proteksyon sa mga bata laban sa pang-aabuso at eksploitasyon. Ayon sa dokumento, iniutos ng hukuman ang agarang pag-aresto sa akusado at nakasaad din na “No Bail Bond” ang rekomendasyon para sa kanyang pansamantalang kalayaan habang dinidinig ang kaso.

Ayon sa impormasyong kumakalat online, nag-ugat umano ang kaso sa insidenteng naganap noong nakaraang taon kung saan isang 15-anyos na dalagita ang umano’y pinagsamantalahan ng akusado. Lumabas din sa mga alegasyon na hinahawahan pa umano ng tulo ng suspek ang biktima. Nagsumbong umano ang dalagita matapos matakot sa umano’y pananakot at pagbabanta na ginagawa ng akusado laban sa kanya.

Nakalagay rin sa rekord na inatasan ang iba’t ibang law enforcement agencies kabilang ang NBI Bulacan, PNP Bulacan, CIDG at PNP Biñan upang ipatupad ang warrant sa loob ng itinakdang panahon. Hanggang sa ngayon ay wala pang inilalabas na opisyal na pahayag ang kampo ng akusado kaugnay sa mga alegasyon laban sa kanya.

Nasa comment section ang kopya ng warrant.

TAHO VENDOR, PATAY SA PAMAMARIL SA SJDM

Nasawi ang isang taho vendor matapos pagbabarilin ng hindi pa nakikilalang mga armadong lalaki sa Sitio Quarry, Brgy. Minuyan Proper, San Jose del Monte, Bulacan. Nakakadurog ng puso ang insidente dahil mismong ang kanyang 6-anyos na anak ang nakasaksi sa pamamaril habang magkasama silang sakay ng tricycle.

Ayon sa paunang imbestigasyon, tinambangan umano ng mga suspek ang biktima habang bumibiyahe. Ilang putok ng baril ang umalingawngaw sa lugar na naging dahilan upang agad na mawalan ng buhay ang vendor. Himala namang hindi nasaktan ang batang kasama nito na agad na nailayo sa peligro matapos ang insidente.

Mabilis na nagsagawa ng follow-up operation ang mga awtoridad upang matukoy ang pagkakakilanlan at motibo ng mga salarin. Patuloy ding sinusuri ng pulisya ang mga kuha sa CCTV at testimonya ng mga residente sa lugar.

Umani ng matinding reaksiyon online ang insidente, lalo na sa kalagayan ng batang nakakita mismo sa sinapit ng kanyang ama. Marami ang nananawagan ng agarang hustisya at mas mahigpit na seguridad laban sa tumataas na kaso ng karahasan.