Task Force Highlander

𝟖𝟔𝐈𝐁 𝐍𝐀𝐊𝐈𝐈𝐒𝐀 𝐒𝐀 𝐏𝐀𝐆𝐆𝐔𝐍𝐈𝐓𝐀 𝐍𝐆 𝐈𝐊𝐀-𝟖𝟒 𝐀𝐑𝐀𝐖 𝐍𝐆 𝐊𝐀𝐆𝐈𝐓𝐈𝐍𝐆𝐀𝐍: 𝐆𝐈𝐓𝐈𝐍𝐆 𝐍𝐆 𝐁𝐀𝐘𝐀𝐍𝐈 𝐈𝐒𝐈𝐍𝐀𝐁𝐔𝐇𝐀𝐘

Buong dangal na nakibahagi ang mga kasundaluhan ng 86th Infantry “Highlander” Battalion sa paggunita ng ika-84 na Araw ng Kagitingan na ginanap sa Heritage Memorial Park, Brgy. Roxas, Solano, Nueva Vizcaya ngayong ika-9 ng Abril 2026, na may temang “Giting ng Bayani, Pamana sa Salinlahi.”

Ang aktibidad ay pinangunahan ni MGen Gulliver L. Siñeres, Commander, 5th Infantry Division, Philippine Army bilang panauhing pandangal at tagapagsalita. Nakiisa rin si BGen Rhoderick L. Parallag, Commander, 502nd Infantry Brigade, kasama si Ltc Rod A. Babaran Jr., Commanding Officer ng 86IB, at Ltc Paulo A. Espinosa, Director ng 203rd Community Defense Center. Ang nasabing aktibidad ay dinaluhan din ng mga kinatawan mula sa Pamahalaang Panlalawigan ng Nueva Vizcaya, Lokal na Pamahalaan ng Solano, Kagawaran ng Turismo, Nueva Vizcaya State University, Girl Scout of the Philippines Nueva Vizcaya Chapter, Sons and Daughter Association Inc., laang-kawal ng 203rd RRIBn, iba’t-ibang ahensya ng pamahalaan, at mga beterano sa pangunguna ng Philippine Veterans Affairs Office.

Sa kanyang mensahe, binigyang-diin ni MGen Siñeres na ang Araw ng Kagitingan ay hindi lamang pag-alala sa nakaraan kundi isang paalala at hamon sa kasalukuyan at sa hinaharap—na ang diwa ng kabayanihan ay dapat patuloy na isabuhay at ipamana sa susunod na henerasyon.

Ang Araw ng Kagitingan, na kilala rin bilang “Day of Valor o Bataan Day”, ay ginugunita bilang pag-alala sa kabayanihan ng mga sundalong pilipino noong Ikalawang Digmaang Pandaigdig, partikular ang pagbagsak ng Bataan noong ika-9 ng Abril taong 1942 at ang makasaysayang ‘Death March’ na kumitil sa libo-libong buhay ng mga sundalong pilipino.

Sa kasalukuyan, ito ay ginugunita bilang bahagi ng Philippine Veterans Week, kung saan patuloy na kinikilala ang mahalagang papel at sakripisyo ng mga beterano sa pagkamit ng kalayaan ng bansa.

Ang 86IB ay nananatiling matatag sa tungkulin nito na ipagtanggol ang mga komunidad sa area na nasasakupan at panatilihing buhay ang diwa ng kagitingan—hindi lamang sa alaala ng nakaraan, kundi sa bawat kilos at sakripisyo para sa kapayapaan at kinabukasan ng sambayanang pilipino.

“𝘈𝘯𝘨 𝘵𝘶𝘯𝘢𝘺 𝘯𝘢 𝘱𝘢𝘨𝘱𝘶𝘱𝘶𝘨𝘢𝘺 𝘴𝘢 𝘢𝘵𝘪𝘯𝘨 𝘮𝘨𝘢 𝘣𝘢𝘺𝘢𝘯𝘪 𝘢𝘺 𝘩𝘪𝘯𝘥𝘪 𝘯𝘢𝘨𝘵𝘢𝘵𝘢𝘱𝘰𝘴 𝘴𝘢 𝘱𝘢𝘨𝘨𝘶𝘯𝘪𝘵𝘢—𝘪𝘵𝘰 𝘢𝘺 𝘯𝘢𝘬𝘪𝘬𝘪𝘵𝘢 𝘴𝘢 𝘢𝘵𝘪𝘯𝘨 𝘱𝘢𝘨𝘬𝘢𝘬𝘢𝘪𝘴𝘢, 𝘥𝘦𝘥𝘪𝘬𝘢𝘴𝘺𝘰𝘯, 𝘢𝘵 𝘱𝘢𝘵𝘶𝘭𝘰𝘺 𝘯𝘢 𝘱𝘢𝘨𝘭𝘪𝘭𝘪𝘯𝘨𝘬𝘰𝘥 𝘴𝘢 𝘣𝘢𝘺𝘢𝘯.” –𝘼𝙣𝙤𝙣𝙮𝙢𝙤𝙪𝙨