MNCHS Alumni

Sugdan na sa People’s Administration ang Weekend Car-Free Days sa pili lamang nga lugar, sugod ugma, Marso 28, 2026 isip kabahin sa interbensyon sa krisis sa enerhiya.

Subay sa gipagula ni Mayor Joel Mayo Almario nga Executive Order No. 063 ipasirado gikan sa kanto nga dalan atubangan sa City Hall hangtod sa kanto sa 7-Eleven ingon man ang dalan kung asa nahimutang ang Night Market padulong sa kanto atbang sa Baywalk Hotel.

Ipatuman kini matag Sabado ug Dominggo gikan ala 1:00 sa hapon hangtod alas 7:00 sa gabii. Sulod niining mga orasa, sirado ang dalan alang sa tanang de-makinang sakyanan gawas lang sa mga emergency response, law enforcement, ug uban pang awtorisadong service vehicles.

Mahimo kining gamiton sa mga Matinian sama sa walking, jogging, ug uban pang ehersisyo ug sports sama sa sikat karon nga Pickleball. Gidasig usab ang mga lokal nga MSMEs sa pag-abli og mga pop-up stalls ingon man ang mga buskers, artists, ug coffee carts.

Tinguha sa People’s Administration nga mabawasan ang konsumo sa kuryente ug petrolyo apil na ang pag-promotar sa mas himsog nga lifestyle. Ginaawhag ni Mayor Almario nga magsambuok ang komunidad pinaagi sa pag-apil niining inisyatibo sa pagdaginot sa enerhiya. | CIO

Together, Yes We Can
Para Sa Tanan