Auto Reliable Insurance Services

𝐋𝐓𝐎, 𝐍𝐚𝐠𝐛𝐢𝐠𝐚𝐲 𝐧𝐠 3-𝐁𝐮𝐰𝐚𝐧𝐠 𝐄𝐱𝐭𝐞𝐧𝐬𝐢𝐨𝐧 𝐬𝐚 𝐦𝐠𝐚 𝐦𝐚𝐠-𝐞-𝐞𝐱𝐩𝐢𝐫𝐞 𝐧𝐚 𝐋𝐢𝐬𝐞𝐧𝐬𝐲𝐚 𝐚𝐭 𝐑𝐞𝐡𝐢𝐬𝐭𝐫𝐚𝐬𝐲𝐨𝐧 𝐧𝐠𝐚𝐲𝐨𝐧𝐠 𝐀𝐛𝐫𝐢𝐥

Nag-anunsyo ang Land Transportation Office o LTO ng tatlong buwang extension para sa mga driver’s license, conductor’s license, student permit, at vehicle registrations na mag-e-expire ngayong Abril 2026.

Ayon kay LTO Chief Asec. Markus Lacanilao, ipinatupad ang hakbang sa direktiba ng Department of Transportation sa pangunguna ni Secretary Giovanni Lopez, alinsunod na rin sa utos ni Pangulong Ferdinand “Bongbong” Marcos Jr., upang maibsan ang epekto ng patuloy na krisis sa presyo ng langis.

Sa ilalim ng polisiya, mananatiling valid sa loob ng karagdagang tatlong buwan ang mga lisensya at rehistrasyon na mag-e-expire ngayong Abril, at walang ipapataw na multa sa mga motorista sa loob ng nasabing panahon.

Paliwanag ng LTO, malaking tulong ito lalo na sa mga public transport operators at mga nagdadala ng mahahalagang produkto tulad ng mga produktong agrikultural.

Dagdag pa ni Lacanilao, kahit masangkot sa aksidente ang isang motorista na sakop ng extension period, mananatiling valid at legal ang kanilang lisensya.

Ang naturang extension ay agad na epektibo ngayong Abril at nagbibigay ng sapat na panahon sa mga motorista upang makapag-renew batay sa kanilang kakayahan at sitwasyon.