Juander Radyo Tagum 100.7 FM

𝐒𝐄𝐍𝐀𝐓𝐎𝐑 𝐊𝐈𝐊𝐎 𝐏𝐀𝐍𝐆𝐈𝐋𝐈𝐍𝐀𝐍, 𝐏𝐎𝐒𝐈𝐁𝐋𝐄𝐍𝐆 𝐌𝐀𝐇𝐈𝐌𝐎𝐍𝐆 𝐈𝐌𝐏𝐄𝐀𝐂𝐇𝐌𝐄𝐍𝐓 𝐌𝐀𝐍𝐀𝐆𝐄𝐑 𝐁𝐀𝐓𝐎𝐊 𝐕𝐏 𝐒𝐀𝐑𝐀 𝐃𝐔𝐓𝐄𝐑𝐓𝐄

GIPADAYAG ni Senador Francis “Kiko” Pangilinan nga iya pang gihuna-huna ang posibilidad nga mahimong impeachment manager sa gilauman nga impeachment trial batok kang Bise Presidente Sara Duterte.

Sumala ni Pangilinan, wala pa’y pinal nga desisyon gikan sa Senado kabahin sa maong isyu ug magdepende pa kini sa desisyon sa kadaghanan sa mga senador.

Dugang pa niya, administrative o pangdumala lamang ang tahas sa impeachment manager ug tumong niini nga masiguro nga hapsay ug organisado ang dagan sa proceedings.

Giingon usab sa senador nga kinahanglan pang masayran ug aprobahan ang mga lagda ug panuntunan sa impeachment trial sa dili pa kini opisyal nga sugdan, ug kung mahinayon iyaha matud pa kining tindogan ug lauman ang patas nga diskusyon sa mahitabong impeachment trial sa Senado.

𝐏𝐀𝐂𝐐𝐔𝐈𝐀𝐎, 𝐌𝐀𝐆𝐋𝐔𝐍𝐒𝐀𝐃 𝐎𝐆 𝐁𝐀𝐆-𝐎𝐍𝐆 𝐏𝐑𝐎𝐅𝐄𝐒𝐒𝐈𝐎𝐍𝐀𝐋 𝐏𝐈𝐂𝐊𝐋𝐄𝐁𝐀𝐋𝐋 𝐋𝐄𝐀𝐆𝐔𝐄 𝐒𝐀 𝐏𝐈𝐋𝐈𝐏𝐈𝐍𝐀𝐒

ANDAM nang ilunsad ni Filipino boxing icon Manny “Pacman” Pacquiao ang bag-ong professional sports league, ang sikat nga sporting event nga pickleball.

Ang Maharlika Pilipinas Pickleball Tour (MPPT) gikatakdang sugdan karong tuiga isip professional league nga adunay basbas gikan sa Games and Amusements Board.

Magrepresentar sa torneyo ang mga team gikan sa Metro Manila, Luzon, Visayas ug Mindanao sa usa ka team-based nga kompetisyon nga himuon matag weekend.

Sa unang season, adunay premyong mokabat og dili moubos sa PHP 5 milyon.

Matud ni Pacquiao, padayon gihapon ang iyang misyon sa pagpalambo sa isports ug paghatag og higayon sa mga atleta aron mapakita ang ilang talento ug makadala og dungog sa ilang syudad ug probinsya.

Bisan bag-o pa ang pickleball sa Pilipinas, giingon ni Pacquiao nga sayon kini makat-onan ug daghan usab og bag-ong talento sa nasud nga angay tagaan og kahigayonan.

Sumala kang MPPT Chief Executive Officer Joe Ramos, tulo na ka teams ang nakumpirma nga moapil, samtang gilauman nga makumpleto ang walo ka teams sulod ning bulana.

Sugdan ang MPPT pinaagi sa lima ka legs nga invitational tournament karong tuiga.

Ang matag team adunay tulo ka lalaking players ug tulo ka babayeng players nga moapil sa men’s doubles, women’s doubles ug mixed doubles.

Dugang pa, ang round robin matches himuon matag Sabado, samtang ang top teams mosulod sa quarterfinals sa Domingo.

Isunod usab ang semifinals ug finals. Matud ni MPPT Commissioner Mark Espinosa, kini nga porma sa torneyo magpakita sa giladmon sa talento sa mga Pilipinong pickleball players ug maghatag og kulbahinam nga team competition.

Photo Courtesy : Rebanse