DXDN Radyo Ukay

‘ILLEGAL MINING’ SA PANTUKAN 30 NADAKPAN; ₱5.54-M GOLD ORE UG EKIPO NAREKOBER

Anaa sa 30 ka mga indibidwal ang nadakpan sa joint anti-illegal mining operation didto sa Barangay Araibo, Pantukan niadtong Hulyo 7, 2026.

Narekober sa mga awtoridad ang 128 ka sako sa gidudahang gold ore, mga kagamitan sa ilegal nga pagmina, usa ka Isuzu ELF truck ug mga armas nga adunay kinatibuk-ang kantidad nga mokabat sa ₱5.54 milyon.

Dungan sa follow-up operation, nadakpan usab ang tulo ka dugang nga suspek ug narekober ang tulo ka armas ug mga bala.

Anaa karon sa kustodiya sa CIDG Davao de Oro ang mga dinakpan, samtang gitugyan sa MGB Region XI ang mga narekober nga mineral ores ug kagamitan.

📷PNP

DAVAO LIGHT GIPANIGURO ANG HAPSAY NGA TRANSISYON HUMAN SA ERC ORDER

Gi-welcome sa Davao Light and Power Company, Inc. (Davao Light) ang bag-ong Order sa Energy Regulatory Commission (ERC) ubos sa ERC Case No. 2025-038 MC, nga nagtakda sa Davao Light isip bugtong distribution utility nga adunay awtoridad ug katungod sa pag-operate, pagpangolekta sa bayranan, ug pagpaningil sa mga konsumante sulod sa mga lugar nga sakop sa ilang expanded franchise areas.

Para malikayan ang kalibog sa mga konsumante ug posibilidad sa doble nga paningil, gimandoan sa ERC ang Northern Davao Electric Cooperative, Inc. (NORDECO) nga hunongon dayon ang tanang pagpaningil ug pagpangolekta sa Island Garden City of Samal (IGACOS), Tagum City, ug sa mga lungsod sa Asuncion, Kapalong, New Corella, San Isidro, ug Talaingod.

Gimandoan usab ang NORDECO nga itugyan ngadto sa Davao Light ang tanang rekord sa mga konsumante ug billing data sulod sa 15 ka adlaw.

Gipasalig sa Davao Light ang hapsay nga transisyon ug buhaton niini ang tanan aron mahatag ang kalidad ug kasaligan nga serbisyo.

"This order is a significant step forward for the consumers in our expanded franchise areas. We are fully committed to ensuring a seamless transition and will work tirelessly to uphold the quality and reliability of service that our customers expect and deserve. We appreciate the patience of our new customers as we work through this handover process," sulti
NinArnel D. Bersabe, Senior Assistant Vice President - North Davao of Davao Light.

Dugang pa sa ERC Order nga magpabilin sa pagkakaron nga status quo sa probinsya sa Davao de Oro, kon diin ang NORDECO magpadayon sa operasyon hangtod sa pormal nga pagkuha sa Davao Light sa distribution system sa maong lugar.

Gipasalig usab sa Davao Light ang tanang naapektuhang residente ug mga negosyo nga walay paghunong sa suplay sa kuryente atol sa transisyon.

Gisulti sa DLPC nga ang order sa ERC napalig-on ang Republic Act No. 12144 ug sa ligal nga pagbalhin sa mga assets pinaagi sa mga Writ of Possession nga gipagawas sa korte.

2 NADAKPAN SA MADAUM; ₱204-K ‘SHABU’ NAKUHA

Nasikop sa mga sakop sa Special Operations Unit 11, PNP Drug Enforcement Group ang duha ka giingong drug personalities dungan sa buy-bust operation didto sa Barangay Madaum, Tagum City, Davao del Norte alas 4:21 sa hapon, Hulyo 3.

Giila ang mga dinakpan nga sila si alyas “Long”, 41-anyos, usa ka High-Value Individual (HVI), ug usa ka alyas “Camille”, 25-anyos, usa ka Street-Level Individual (SLI).

Nakuha gikan sa duha sa operasyon ang 30 gramos sa gidudahang shabu nga nagkantidad og ₱204,000.

📷 PDEG SOU XI