Markhor Times

کل جماعتی حریت کانفرنس کے کنوینئر غلام محمد صفی کی سربراہی میں حریت کانفرنس کے وفد نے گلگت میں مرکزی انجمن امامیہ گلگت بلتستان کے مرکزی دفتر کا دورہ کیا جہاں انجمن کے صدر سید شرف الدین، جنرل سیکرٹری حاجی غلام عباس، ڈپٹی جنرل سیکرٹری کوثر حسین، نائب صدر نعیم سلیمان، سیکرٹری ترقیاتی امور الحاج طارق عباس، سینئر نائب صدر سخی احمد جان اور دیگر عہدیداران نے وفد کا خیر مقدم کیا۔
ملاقات میں مقبوضہ جموں کشمیر کی موجودہ صورتحال، بھارتی قابض افواج کے جاری انسانی حقوق کی سنگین خلاف ورزیوں، کشمیری عوام کی جدوجہدِ آزادی اور 19 جولائی 1947ء کی تاریخی قراردادِ الحاقِ پاکستان کی اہمیت پر تفصیلی تبادلۂ خیال کیا گیا۔
اس موقع پر گفتگو کرتے ہوئے کل جماعتی حریت کانفرنس کے کنوینئر غلام محمد صفی نے کہا کہ تحریکِ پاکستان اور تحریکِ آزادیٔ کشمیر میں علماء کرام نے ہمیشہ تاریخ ساز اور قابلِ ستائش کردار ادا کیا ہے۔ انہوں نے کہا کہ دینی قیادت نے ہر دور میں حق، آزادی اور عوامی امنگوں کی ترجمانی کرتے ہوئے کشمیری عوام کے حوصلے بلند کیے ہیں، جس پر پوری قوم انہیں خراجِ تحسین پیش کرتی ہے۔ انہوں نے کہا کہ مقبوضہ کشمیر کی عوام امام حسین کے نقش قدم پر عمل پیرا ہیں۔
غلام محمد صفی نے کہا کہ سرینگر میں 19 جولائی 1947ء کی قراردادِ الحاقِ پاکستان کی منظوری کشمیری عوام کے اجتماعی عزم اور پاکستان کے ساتھ ان کے تاریخی، نظریاتی اور جذباتی رشتے کی روشن علامت ہے۔ انہوں نے کہا کہ بھارت تمام تر ریاستی جبر، ظلم و تشدد اور غیر قانونی اقدامات کے باوجود کشمیری عوام کے جذبۂ آزادی کو دبانے میں ناکام رہا ہے اور کشمیری عوام اپنے حقِ خودارادیت کے حصول تک اپنی جدوجہد جاری رکھیں گے۔
مرکزی انجمن امامیہ گلگت بلتستان کے صدر سید شرف الدین اور جنرل سیکرٹری حاجی غلام نے کہا کہ ہم مظلومین کے ساتھ زینہ سپر ہیں۔ جب معاملہ مقبوضہ کشمیر کے مسلمانوں کا کو تو یہ انجمن ہر محاذ پر ان کے ساتھ کھڑے ہیں اور ہم گلگت بلتستان کو ریاست جموں کشمیر کا حصہ سمجھتے ہیں اور اقوامِ متحدہ کی قراردادوں میں ہی دیرنہ مسئلہ کشمیر کا حال دیکھتے ہیں۔ انہوں نے کہا کہ گلگت بلتستان کی عوام مقبوضہ جموں کشمیر کے عوام کے ساتھ مکمل یکجہتی کا اظہار کرتے ہیں اور منصفانہ جدوجہدِ آزادی کی اخلاقی، سیاسی اور سفارتی حمایت جاری رکھنے کے لئے کوشاں ہیں۔ انہوں نے 19 جولائی کی تقریب کو تاریخی اہمیت کا حامل قرار دیتے ہوئے اس کی کامیابی کے لئے ہر ممکن تعاون کی یقین دہانی کرائی۔
وفد میں کل جماعتی حریت کانفرنس کے سیکرٹری جنرل ایڈووکیٹ پرویز احمد شاہ، سینئر حریت رہنما راجہ خادم حسین شاہین، اعجاز رحمانی، شیخ عبدالماجد، زاہد صفی اور زاہد اشرف بھی شامل تھے۔

اے پی ایچ سی-اے جے کے (APHC-AJK) کے وفد کی گلگت میں گورنر جی بی سید مہدی شاہ سے ملاقات
19 جولائی یومِ الحاقِ پاکستان کے تقریبات اور کشمیر کی صورتحال پر تبادلہ خیال
آل پارٹیز حریت کانفرنس آزاد جموں و کشمیر (اے پی ایچ سی-اے جے کے) کے کنوینر غلام محمد صفی کی قیادت میں ایک اعلیٰ سطحی وفد نے گلگت ہاؤس میں گلگت بلتستان کے گورنر سید مہدی شاہ سے ملاقات کی۔ ملاقات میں 19 جولائی یومِ الحاقِ پاکستان کے انتظامات اور مقبوضہ کشمیر کی موجودہ صورتحال پر تفصیلی تبادلہ خیال کیا گیا۔

کشمیر میڈیا سروس کے مطابق، اجلاس میں 19 جولائی کو گلگت میں منعقد ہونے والی عوامی ریلی اور اجتماع کے انتظامات کا جائزہ لیا گیا، جس میں عوام کی بھرپور شرکت اور مسئلہ کشمیر کو مؤثر طریقے سے اجاگر کرنے پر توجہ مرکوز کی گئی۔ وفد میں جنرل سیکرٹری ایڈووکیٹ پرویز احمد شاہ، راجہ خادم حسین شاہین، سید اعجاز رحمانی، شیخ عبدالمجید، زاہد صفی، زاہد اشرف اور کوثر اقبال شامل تھے۔

اس موقع پر غلام محمد صفی نے کہا کہ 19 جولائی 1947 کا یومِ الحاقِ پاکستان کشمیری عوام کے تاریخی عزم اور پاکستان کے ساتھ ان کے اٹوٹ رشتے کی علامت ہے۔ انہوں نے کہا کہ جموں و کشمیر کے تمام خطوں کے عوام اقوام متحدہ کی قراردادوں کے مطابق اپنے حقِ خود ارادیت کے حقدار ہیں۔

گورنر سید مہدی شاہ نے کہا کہ گلگت بلتستان کے عوام کشمیری عوام کے ساتھ اپنے تاریخی، مذہبی اور قومی رشتے پر فخر کرتے ہیں اور کشمیر کے منصفانہ حل کے لیے اپنی سیاسی، اخلاقی اور سفارتی حمایت جاری رکھیں گے۔ انہوں نے مزید کہا کہ پاکستان اور گلگت بلتستان کے عوام کشمیریوں کی جدوجہدِ آزادی میں ان کے ساتھ کھڑے ہیں۔

دونوں فریقین نے مسئلہ کشمیر کو مزید مؤثر طریقے سے اجاگر کرنے اور یومِ الحاقِ پاکستان کو پورے جوش و خروش سے منانے کے عزم کا اعادہ کیا۔

دریں اثنا، غلام محمد صفی کی قیادت میں اے پی ایچ سی-اے جے کے کے ایک اور وفد نے گلگت بلتستان اسمبلی میں اپوزیشن لیڈر، سابق وزیر اعلیٰ اور مسلم لیگ (ن) گلگت بلتستان کے صدر حافظ حفیظ الرحمان سے بھی ملاقات کی۔

ملاقات میں مقبوضہ کشمیر کی تازہ ترین صورتحال، تحریکِ آزادیِ کشمیر، گلگت میں 19 جولائی کی ریلی کے انتظامات اور قومی و بین الاقوامی سطح پر مسئلہ کشمیر کو اجاگر کرنے کے طریقوں پر بات چیت ہوئی۔

اس موقع پر غلام محمد صفی نے کہا کہ 19 جولائی 1947 کا دن کشمیریوں کی جدوجہد میں ایک تاریخی سنگِ میل ہے جب آل جموں و کشمیر مسلم کانفرنس نے الحاقِ پاکستان کی قرارداد منظور کی تھی۔ حافظ حفیظ الرحمان نے کشمیری عوام کی حقِ خود ارادیت کی جدوجہد کے لیے اپنی پارٹی کی غیر متزلزل حمایت کا اعادہ کیا اور کہا کہ گلگت بلتستان کے عوام نے ہمیشہ اپنے کشمیری بھائیوں کا ساتھ دیا ہے اور مستقبل میں بھی دیتے رہیں گے۔ انہوں نے کہا کہ جنوبی ایشیا میں پائیدار امن کے لیے مسئلہ کشمیر کا اقوام متحدہ کی قراردادوں کے مطابق حل ہونا ضروری ہے۔

انہوں نے یقین دہانی کرائی کہ مسلم لیگ (ن) گلگت بلتستان، گلگت میں 19 جولائی کو ہونے والی یومِ الحاقِ پاکستان کی ریلی میں بھرپور شرکت کرے گی۔