Bazm e Hayat e Adab

پاکستان زندہ باد

کتاب خریدنے کیلئے رابطہ کریں
03126239254
03451906326

جناب سلیم ابر رانجھا صاحب دی خوبصورت تحریر
بابائے پنجابی۔ محمد حیات بھٹی سرگودھا
داستانِ سرگودھا! پنجابی ادب دا ہک وڈا تے سِر کڈھواں ناں محمد حیات بھٹی دا اے۔ آپ پنجابی ادب دی اوہ مہان ہستی نیں جنہاں حمد و نعت دے نال نال غزلاں نظماں،مسدس، مرثیے، گیت، قطعے اور خصوصاً دوہڑے وچ اپنا سکّہ منوایا اے۔ایہناں دی پہچان انوکھے خیال تے سوہنے الفاظ نال ہوندی اے۔اوہ انہاں لفظاں نال پھلاں دے ہار تے مالا بناندے نیں۔بھٹی صاحب اپنے ماحول تے معاشرے تے ڈوگھی اکھ رکھدے نیں تے اپنے آسے پاسے کھلرے ہوئے انساناں دے دکھ تے مسائل نوں اجاگر کردے نظر آندے نیں۔اوہ مظلوم تے پیار دے ستائے ہوئے لوگاں دے اتھروآں نوں زبان عطا کردے نیں۔ایہناں دا ہک ایوی وکھرا تے انوکھا انداز اے جہڑا اوہناں نوں دوجے شاعراں توں الگ کردا اے اوہ ایہہ وے کہ بھٹی صاحب اپنے خیال تے سوچ نوں ہک کہانی دے انداز وچ پیش کردے نیں۔
محمد حیات بھٹی صاحب ہک نفیس انسان، عظیم دوست تے اعلیٰ شاعر نیں۔اوہ 12 مارچ 1954وچ حاجی نور محمد بھٹی دے گھر موضع کوٹ چوغطہ، تحصیل شاہ پور پیدا ہوئے۔میٹرک تک تعلیم حاصل کیتی تے محکمہ انہار وچ ملازم ہو گئے۔ریٹائر منٹ توں بعدہن اپنے بچیاں نال زندگی گزار رہئے نیں۔ اوہ چھوٹیاں نال پیار، وڈیاں دا ادب تے سارے شاعراں دا احترام کردے نیں۔اگر کسے شاعر دی اصلاح وی کرنی ہووے تے ایہو جیا انداز اپناندے نیں کہ اوہدی عزت وی مجروح نہ ہووے۔آپ نویں لکھاریاں دی حوصلہ افزائی کردے نیں تے بذمِ حیاتِ ادب وچ اوہناں نوں کلام سنان دا بھرپور موقع عطا کردے نیں۔آپ ہر شخص دا دل جتّن دا ہنر تے ول جانندے نیں۔آپ پنجابی پڑھن، سنن تے لکھن والیاں دے مقام تے مرتبہ دا وی خیال رکھدے نیں۔شاعر برادری وی محمد حیات بھٹی دی قدر کردی اے تے اوہناں دی ملاقات نوں غنیمت سمجھدی اے۔ہر بندے دی اے دلی خواہش تے حسرت ہوندی اے جے اوہ حیات بھٹی ہوراں نال ہک تصویر کھچاوے۔آپ رائے منور حسین منور دے آف ناڑی دے لائق شاگرد نیں۔
پورے پنجاب وچ بھاویں اوہ لہندا پنجاب ہووے یا چڑھدا پنجاب ہووے محمد حیات بھٹی صاحب نوں پڑھیا تے سنیا جاندا اے۔کہڑا مشہور پنجابی گلوکار نئیں جہنیں حیات بھٹی دے گیت تے دوہڑیاں نوں گا کے ناں تے شہرت نہ کمائی ہووے۔اوہناں وچ طالب حسین درد، اللہ دتہ لونے والا، منصور ملنگی تے ارشاد حسین ٹیڈی شامل نیں۔عظیم کلاسیکی گلوکارہ نور جہان نے وی بھٹی صاحب دا گیت گایا اے۔اگر بھٹی صاحب دے شاگرداں دی لسٹ بنائی جاوے تے ہک پورا دفتر بن جاناں ایں۔آپ دے جگ مشہور شاگرداں وچوں عاشق حسین راہی، غلام محمد درد ،اسمعیل ارشد،عبدالرحمن ہمدردتے کاوش تمیمی شامل نیں۔سرگودھا دے بارے تے پنجابی شاعراں دے بارے چھپّن والے تمام تذکریاں وچ حیات بھٹی دا ناں چوٹی تے ملدا اے۔سرگودھا وچ ہوائی اڈے تے کنّو توں بعد اگر کوئی مشہور شے ہے تے اوہ محمد حیات بھٹی دی شخصیت اے۔آپ عرصہء دراز توں پنجابی ادب اُتے چھائے ہوئے نیں۔
جدوں وی پنجابی دوہڑے دا ذکر ہووے گامحمد حیات بھٹی دا ناں بڑے ادب تے احترام نال لیا جاوے گا۔آپ کسے تعارف دے محتاج نئیں۔اس وقت پنجابی ادب تے راج کرن والے واحد سلطان نیں جہڑے اپنے محبت بھرے انداز نال دل موہ لین دا فن جانندے نیں۔بھٹی صاحب دی کتاب ”حیاتی دا پینڈا“ 2016وچ اقبال پریس سرگودھا توں چھپ چکی اے تے ہن دوجی کتاب ”تاریاں دی لَو“ چھاپے چھڑھن واسطے بے تاب اے اس کتاب دی آمد تے تماہی انٹرنیشنل میگزین مہاندرے سرگودھا دے بانی و چیف ایڈیٹر سلیم ابر رانجھا تے انہاں دی ٹیم ولوں بھٹی صاحب نوں لکھ لکھ مبارک باد دیندے آں۔ مالک ایہناں نوں صحت سکھ سلامتی آلی لمی حیاتی دیوے تے ایہناں دا سایہ ساڈے سراں تے سداں سلامت رکھے۔
ایہ سارا کریڈٹ جاندائے بھائی یونس خاموش صاحب تے عبدالرحمٰن ہمدرد صاحب نوں
بھائی یونس صاحب سلامت رہیں تاقیامت رہیں
منجانب: تماہی انٹرنیشنل میگزین مہاندرے سرگودھا