Gender Monitoring Office

Ubuyobozi bw'Urwego rushinzwe kugenzura iyubahirizwa ry'Ihame ry'Uburinganire n'Ubwuzuzanye bw'Abagore n'Abagabo mu iterambere ry'Igihugu (GMO) bwifurije abakozi bose umunsi mwiza w'umurimo.

Kuwa Gatanu tariki ya 17 Mata 2026
6, Mu Murenge wa Nyanza, Akarere ka Gisagara habereye ibirori byo gusoza Icyumweru cy’Uburinganire, byitabiriwe n’abayobozi batandukanye barimo Umugenzuzi Mukuru w’Uburinganire wungirije Florien H Rurihose, Umunyamabanga Nshingwabikorwa w’Intara y’Amajyepfo Nshimiyimana Vedaste, ndetse n’Umuyobozi w’Akarere ka Gisagara, Rutaburingoga Jerome.
Mu ijambo rye, Umuyobozi w’Akarere ka Gisagara yagaragaje ko iki cyumweru cyabaye umwanya mwiza wo kwegera imiryango, kumva ibibazo byayo no kubikemura ku gihe. Yashimangiye ko ari intambwe ikomeye mu kwimakaza uburinganire n’ubwuzuzanye mu miryango, ari nabyo shingiro ry’iterambere rirambye.
Ubuhamya bwatanzwe n’Umuryango wa Habuhazi Jean de Dieu na Nidufasha Florence bwagaragaje impinduka nziza zituruka ku gusobanukirwa ihame ry’uburinganire n’ubwuzuzanye, aho bavuye mu makimbirane bagatera imbere. Basabye indi miryango ikibana mu makimbirane kuyareka kuko adindiza iterambere ry’umuryango n’iry’igihugu muri rusange.
Muri ibi birori, imiryango 17 yabanaga mu buryo butemewe n’amategeko yasezeranye ku mugaragaro, isabwa kubaka ingo zishingiye ku bwubahane, uburinganire n’ubwuzuzanye.
Umugenzuzi Mukuru w’Uburinganire wungirije Florien H Rurihose yagaragaje ko kwimakaza uburinganire n’ubwuzuzanye bisaba ubufatanye bwa buri wese, anashimangira ko ari inkingi y’iterambere rirambye n’imibereho myiza y’abaturage.
Ibi birori byasojwe n’ubusabane no gushyigikira imiryango itandukanye mu rwego rwo gukomeza kuyifasha mu rugendo rw’iterambere.