Ghamry

‏‎كلهم في الـ interview بيقولوا بنحب نشتغل كـ فريق عمل بس مش كلهم صادقين، الشاطر هو اللي ميستهلكش طاقته في صراعات مع حد ويتجنب العداوة قدر الامكان، الشغل هيتحرل لجحيم لو انت مختلف مع زملائك في العمل ( فكرة انك في الانترڤيو تضحك علي مديرك وتقوله بحب العمل وسط فريق هتعاني منها جدًا لو انت بتكدب علي فكره ) نجاحك في شغلك انك تكون محبوب من الجميع.. إدارة وزملاء وعملاء وكبير وصغير وحلو ووحش ومتخليش الناس تختلف عليك.

ومتنساش ..
يقول ابن الجوزي رحمه الله: "اعلم أن الناس إذا أعجبوا بك فإنما يعجبون بستر الله عليك"

لما تبقي مدير ماتبقاش جلنف وتدوس علي الموظفين الـ تحتك وتتعامل بجلفنه معاهم،اه حدد Deadlines واه حاسب اللي بيتأخر وابعت رساله حلوه للي بيجتهد وكرم الي بيحاول،خلي طريقك وانت مروح كله رسايل وفويسات تشجيع لفريقك( بتبسط جدًا من إدارة شركتي لما مديري بيبعتلي فويس أو رسالة بيشجعني حتي علي الحاجه اللي حاولت فيها وفشلت ) فلو انت مدير خليك إنسان واعرف انك لما بتكبر في شغلك وتترقي فانت كده بتبقي شغال عند اللي تحتك مش هما الـ شغالين عندك.

يا بخت اللي لقى ناس حلوة في رحلته
واحدة مِن الجُمل الصادقة جدًا اللي قرأتها؛ جُملة "الإنسان اللي بيختار ناسُه صح.. بيعيش مسنود طول العمر"

جُملة صادقة جدًا وواقعية لأن فعلًا اللي مسنود من ناس بتحبه بجد -بعد ربنا- عمره ما بيقع، بس الحقيقة إن ما حدش بيختار ناسه!

احنا ما نعرفش نختار، احنا بنغامر، ويا آه يا لأ، لأن مفيش أي ضمان لأي اختيار مهما كان الإنسان حريص في الاختيار ده!
الموضوع عمره ما كان ذكاء ولا حرص وتأني في الإختيارات، الموضوع عبارة عن رزق، رزق من ربنا، فالحقيقة إن اللي ربنا بيوقع في طريقه ناس صح، بيعيش مسنود طول العمر.

ربنا يرزقنا ناس حنينة وصادقة وبتقدر، ربنا يرزقنا بالناس الصح عشان حقيقي حقيقي يا بخته اللي ربنا يرزقه ناس حلوة في رحلته.