Medical laboratory sciences

نصائح لكل برلوم معلومات حتفيدك جداً في الدراسة وعن تجربة 😁
ركز في المحاضرة :
اتأكد انو المكان الانت قاعد فيه بتقدر تسمع شرح الدكتور كويس وبتقدر تشوف البكتبو في البورت كويس لخّص كلام الدكتور ولو في معلومة حسيت انه كان ضروري تكتبها وفاتت عليك ارجع اسأل الدكتور ولو عندك سؤال غالبك وقّف الدكتور واسأله او أسأله بعد المحاضرة تخلص.
اختار شلة سليمة :
من كل النواحي وخصوصاً الناحية الأكاديمية
شلة بتتونس في المحاضرة ❌
شلة بتتضحك في المحاضرة ❌
شلة بتكسّلك تحضر المحاضرات ❌
شلة بتصل للمحاضرة متأخر ❌
شلة بتحفزك على الغياب ❌
شلة مشاويرها كتيرة وطلعاتها كتيرة وفارغة ❌
استبدلهم ب :
شلة بتتناقش في المواد✔️
شلة بتضع خطط للدراسة ✔️
شلة بتمارس التخصص ✔️
شلة ايجابية وتحفيزية ✔️
شلة ممتازة اكاديمياً ✔️
شلة فاهمة قيمة الزمن وبتستفيد منه ✔️
استفيد من زمنك :
انت مسؤول عن كل ثانية بتضيعها في الفارغة وعشان بعدين م تبكي وتتندم استفيد من كل ثانية في زمنك ادرس، راجع، ذاكر، سمّع، مارس الحاجة الانت بتدرسها وكررها كتيييير حتى لو داخل الجامعة.
استعن بالمكتبة الجامعية :
في معلومات كتييرة يمكن ما تلقاها في قوقل بالصورة الانت عايزاها حتلقاها في المراجع الفي المكتبة وممكن تستعين بدكتور يوضح ليك اكتر فالمكتوب ما زي المشروح.
ما تضيع محاضراتك :
المشروح ما زي المكتوب المشروح ما زي المكتوب المشروح ما زي المكتوب عشرة مرات 👌
أقرأ كتير :
م تعتمد على كلام الدكتور بس او الشيتات، خش قوقل، ابحث في مكاتب خارج الكلية، وسّع دائرة معلوماتك عن الشئ الواحد، واعرف اختلافات الدارسين القبلك في الموضوع المعين عشان دا حيساعدك شديد في الامتحانات وحيخليك زول فاهم وحتنجح حتى لو م مذاكر الشيتات كلها او م مخلص الكتب كلها.
اشرح لدفعتك او شلتك :
في مقولة مفهومها انو لو عايز تاخد ماستر في حاجة اشرحها للحولينك.. حتلاحظ فرق كبيير شديد بعد الخطوة دي لانك حتكون وصلت مرحلة الاستاذ البِشرح وحتعدي الامتحان بسهووولة.
وأخيراً وليس أخيراً :
المجال الاكاديمي اقل حاجة ممكن تستفيد منها في حياتك الجاية.. اتعلم حاجات تانية بعيداً عن تخصصك.. اقرا كتب.. احضر ورشات تثقيفية.. اتعلم مهارات جديدة.. اتعلم عادات جديدة.. كوّن علاقات صداقة... وخليك انسان حقيقي وصاحب هدف ورسالة واياك تستسلم💙🔥