Angels Home

السلام عليكم ورحمة الله
يا ناسنا طمنونا على ملائكتنا ان شاء الله انتوا وهم بخير .. ادوهم بوسات مني .. وابعدوهم عن القنوات الاخبارية .. وما تتناقشوا وتحكوا قدامهم بكونوا سامعين ومركزين .. قولوا ليهم ديل الشرطة بقبضوا في الحرامية والناس الشريرين او اي معنى خلوهم عايشين بالفهم الصحيح للشرطي عسى يكبروا ويلقوا الشرطة شرطة فعلا .. طمنوهم بابتساماتكم وثباتكم .. حتى لو دخلتوا تحت السرير خلوها لعبة واتونسوا او غنوا وانتوا تحت السرير .. لو الوضع عندكم مستقر خلوهم يعيشوا روتينهم اليومي عادي .. ويكون ممتاز لو لعبتوا معاهم العاب جماعية .. لو الكهرباء سمحت لي بنزل ليكم العاب بسيطة تلعبوا بيها الاطفال وتشاركوهم فيها بالذات انتوا زاتكم عندكم فراغ استثمروه معاهم حتستمتعوا كلكم ..
يلا اكتبوا طمنوني عنهم وعنكم .. الكلام عن كل ملائكتنا الكبروا وفاتونا واللسة معانا
في امان الله
ماما غادة

بسم الله الرحمن الرحيم
السبب في اننا قررنا نراجع برنامجنا ونوسع دائرة اهتمامنا ونطلع من قوقعة الرعاية والتعليم الى رحاب اوسع واشمل
السبب ملاحظة ما يقوم به طفل اسيوي او اوروبي والمقارنة بما نفعله نحن باطفالنا
كلهم اطفال ولدوا على الفطرة ليه ديل بعملوا وديل لأ وليه ديل بقدروا وديل لأ
لانه ديل بيئتهم مهيئة واخدوا فرصة لكن نحن لا نهتم بالبيئة من خلال عيون الصغار ..
كما اننا نستسهل العمل بدلا عنهم .. ليه لاحقين شنو !!! ادوا الاطفال ديل فرصة ينجزوا بحسب مقدراتهم
ومن هنا بدينا درب المعرفة وشحذ خبرة السنوات الماضية ودعمها بدراسة التكوين الجسدي والدماغي والحسي للطفل من عمر صفر الى 4 سنوات وحتى ما قبل الولادة ..
النمو والمقدرة والحوجة .. نعرف ونتصرف على أساس المعرفة مع استصحاب المقدرات الفردية المتفاوتة للاطفال .. يعني نتعامل مع كل طفل كحالة استثنائية
من هناك بدأنا .. والى هنا وصلنا .. طورنا بيئتنا واضفنا معينات جديدة وصنعنا وابتكرنا واشترينا أدوات ومعدات ووسائل تترجم أهدافنا الى واقع نعيشه مع اطفالنا
لان النية خالصة والرغبة قوية كانت البداية مفرحة
الخطوات سارت بطيئة جدا لكن ثابتة وواثقة
ووصلنا مرحلة التنفيذ
برنامج متكامل .. متداخل لكن متناغم تعبنا جدا في اعداده لكن (سنسوني) فارسنا الصغير (ياسين) كان عنده الدواء الناجع لتعبنا فشفانا بكلمة منه مع صفارة البداية (WoooooooooW) كان هذا تعبيره وكانت هذه ردة فعله فعرفنا اننا في الطريق الصحيح
سمينا هذه السلسلة #وبعدين عشان حتبقى حكاوي بينا وبينكم تعكس أهدافنا ورؤيتنا وتستقبل نقاشاتكم .. النقد البناء كما الاشادة المفرحة .. نحن نحتاج الاثنين معاً ونثق في أن متابعينا وأعضائنا كرماء وحريصين علينا كما نحن عليهم
نرجو الدعاء لنا بالتوفيق من الله والقبول من اطفالنا
كونوا بخير واستمتعوا ببقية رمضان
غادة أسد

إعلان إداري 🚫

سيكون بإذن الله يوم غد الخميس 13 ابريل 2023 الموافق 22 رمضان 1444 اخر ايام العمل في بيت الملائكة .
وتبدأ اجازة بيت الملائكة السنوية من يوم الجمعة 14 ابريل الموافق 23 رمضان
على ان نستأنف العمل مع انتهاء الاجازة الرسمية في البلاد لعيد الفطر المبارك

تنويه
كالعادة سيتم خصم ايام العطلة غير الرسمية من الرسوم
نتمنى رؤيتكم في كامل الصحة والسعادة ولا تنسونا من صالح دعواتكم
🌹كل عام وانتم بخير 🌹

الادارة ..