Borama Daily Media

Miisaaniyada Dawlada JSL ee 2026. #4,584,959,018,356 shilling.

Kadib ansixinta maanta miisaaniyada 2026 ee Golaha wasiirada waxay ugudbi doontaa guddida dhaqaalaha Baarlamaanka oo horgayn doona Golaha, karibna waxkabadal iyo gorfayn badan ka dib golaha wakiiladu ansixin doono kuna celin doono MW si loo dhaqan galiyo.

Hadda waa wakhtigii la go'aamin lahaa qoondada odorosyada kharash garaynta miisaaniyada 2026, oo ay muhiim tahay in lagu xisaabtamo qoondooyinka iyo qorshaynta waxii horumar ah iyo fursad abuur ah. Gobol walbana iyo deegaan walba oon intii la diyaarinayay dhinaca qabsan sidoo kalena baahiyihiisa si qorshaysan oo damac dheeri ah ku raadin, tixgalin badan kuma yeelanayo maadaama qorshayaasha laga dheegto iyo qaabka loo qaybiyaana aanay lahayn nidaam iyo qaab wadar ogol ah sidoo kalena lagu wada qabacsanyahay.

Iyadoo Gobolka Awdal uu ku jiro xaalad kacsanaan iyo foojignaan arinta Saylac ay taasoo u muuqata inay ka warqabi waayaan wakhtiga ay haboontahay eenay dhaqan galin, waxaan soo jeedin lahaa in lagu baraarugo oo la raadiyo buuga miisaaniyada iyo sida loo qorsheeyey, laguna daro arimaha muhiimka ah ee dhalinyarada, dhaqanka, xildhibaanada iyo xubnaha gobolka fulinta ugu jiraa si isu dhafan oo isla xisaabtan leh loo waajaho.

Shaqaalaynta ku jirta, maalgashiga, mashaariicda iyo waxwalba oo xukuumadu qorshaysay ay noqoto arin wakhtigeeda la fahmo, lagu xisaabtamo cidwalbana doorkeeda qaadato, oo ayna noqon in lagu baraarugo goor ay xeedho iyo fandhaal kala dhaceen.

Qoraalkan ayaa bulshada lala wadaagay kadib ansixintii golaha wasiirada ee maanta:

""Odoroska Miisaaniyadda Dawladda dhexe ee 2026ka ayaa ah 𝟐,𝟖𝟔𝟔,𝟏𝟖𝟑,𝟓𝟔𝟖,𝟏𝟎𝟗 𝐒𝐡𝐒𝐋

Halka ay Miisaaniyadda 2025 ka ahayd: 𝟐,𝟓𝟗𝟑,𝟒𝟑𝟏,𝟐𝟓𝟏,𝟖𝟖𝟕 𝐒𝐡𝐒𝐋;
Faraqa u dhexeeya waa 𝟐𝟕𝟐,𝟕𝟓𝟐,𝟑𝟏𝟔,𝟐𝟐𝟐 𝐒𝐡𝐒𝐋. Marka loo bedelo boqollay Miisaaniyadda 2026-ka waxa ka badan tahay tii 2025-ka 𝟏𝟏%)

Qaybaha ay ka kooban tahay Miisaaniyadda 2026-ka ee Qaranka Somaliland, ayaa kala ah:

1. Miisaaniyadda Dawladda Dhexe (63%);
2. Miisaaniyadda Dawladaha Hoose: (12%);
3. Mashaariicda Baanka Adduunka iyo Baanka H.Africa: (17%);
4. Miisaaniyadda Hay’adaha Macaashka sameeya: (8%)

ISU GEYNTA GUUD EE MIISAANIYADDA QARANKA JSL SANNADKA 2026-KA:- 𝟒,𝟓𝟖𝟒,𝟗𝟓𝟗,𝟎𝟏𝟖,𝟑𝟓𝟔 𝐒𝐇𝐒𝐋""

Qaabka mashaariic ahaan loo qorsheyey loona qoondeeyey waxay ku faahfaahsanyihiin buugaga miisaaniyada oo ay muhiimtahay in la helo oo lagu xisaabtamo, wakhtigeedana la waajaho, laguna dhex waddo arimaha masiiriga ah ee taagan, iyadoo gobolka Awdal iyo Salal na yihiin meelaha ugu waawayn ee dalka miisaaniyadiisu ku diirsantahay.

Istaw, Istaw, Salaad walba goorteedaa la tukadaa.

Allaa Mahadleh

Qore: Ilyas Abdirahman Hussein