SNA RADIO

Madaxweynaha Jamhuuriyadda Federaalka Soomaaliya ahna Taliyaha Guud ee Ciidamada Qalabka Sida, Mudane Xasan Sheekh Maxamuud, ayaa maanta dhagax dhigay dhismaha xarunta agoonta Ciidanka Xoogga Dalka Soomaaliyeed oo laga hirgelinayo xero Fiyaamo.
Madaxweynaha ayaa sidoo kale xarigga ka jaray dhismayaal muhiim ah oo ay ka mid yihiin Taliska Taakuleynta, xarunta Hoggaanka War-isgaarsiinta iyo Teknolojiyadda Ciidanka Xoogga Dalka Soomaaliyeed, iyo Ajibka Ciidanka.
Munaasabaddan ayaa ku beegneyd xuska sanadguurada 66-aad ee ka soo wareegtay aasaaska Ciidanka Xoogga Dalka Soomaaliyeed, ee 12-ka April.
Madaxweynaha ayaa ku bogaadiyey ciidamada dadaalka iyo naf-hurnimada ay u hayaan difaaca dalka, isaga oo xusay muhiimadda ay leedahay horumarinta adeegyada iyo daryeelka ciidamada iyo qoysaskooda, gaar ahaan agoonta.
Lii Xarago 📸

Wasiirka Gaashaandhigga, Mudane Axmed Macallin Fiqi, ayaa hambalyo u diray saraakiisha, saraakiil-xigeennada, aliflayda, dableyda, dhammaan qaybaha kala duwan ee Ciidanka Xoogga Dalka Soomaaliyeed iyo qoysaskooda, munaasabadda 66-guuradii ka soo wareegtay aasaaska Ciidanka Xoogga Dalka.

Wasiirka ayaa tilmaamay in munaasabaddan ay xambaarsan tahay qiime qaran oo weyn, maadaama ay astaan u tahay taariikhda, halganka iyo doorka ciidanka ee difaaca dalka, ilaalinta madaxbannaanida iyo midnimada ummadda Soomaaliyeed.

Wasiir Fiqi ayaa adkeeyay dadaallada Dowladda Federaalka Soomaaliya ee ku aaddan tayeynta, qalabaynta iyo horumarinta nolosha ciidamada, si ay u gutaan waajibaadkooda qaran si hufan.

Taliyaha Ciidanka Xoogga Dalka Soomaaliyeed S/Guuto Ibraahim Maxamed Maxamuud ayaa Geesiyaasha Ciidanka XDS Soomaaliyeed u diray Hambalyada Sanad guuradii 66 aad ee Kasoo wareegatay Aas aaskoodii

"Ciidanka Xoogga dalka, waa laf dhabarka Ciidanka Qalabka sida ee Soomaaliyeed, waxaana sidoo kale isku hambalyeynaynaa guulaha aan kasoo hooyane Dagaalka dalka looga xoreynayo Argagixisada Arxanka darran.

12-ka April, sanadkii 1960 ayey ahayd markii la aas aasay ciidanka Xoogga dalka Soomaaliyeed, waxaana hadda laga joogaa 66 sano.