Infinity Real Estate

ရေဘေးအတွက် အဝတ်လှူတဲ့သူတွေ အနေနဲ့ လှူတာမလို ၊ လိုတာမလှူ မဖြစ်ရအောင် ကျွန်တော် (၂၀၁၅) ရေဘေးတုန်းက အဝတ်တွေလက်ခံပြီးပို့ပေးခဲ့တဲ့အတွေ့အကြုံလေးမျှဝေပေးချင်ပါတယ်။ ဒီနေရာမှာ လိုတာနဲ့မလိုတာကို ခွဲပြောပေးပါမယ်။ အထူးသဖြင့် တစ်နိုင်တစ်ပိုင် ကယ်ဆယ်ရေးလုပ်မယ့်သူတွေအတွက်ပါ။

အရင်ဆုံးအဝတ်အစားတွေကို ထုပ်ပိုးတဲ့ပုံလေးပြောချင်ပါတယ်။ အဝတ်တွေကိုလိပ်ပြီး သေးသေးကျစ်ကျစ်နဲ့ လူတစ်ယောက်ကို ဘယ်နှစ်ထည်လို့ တစ်ခါတည်း သတ်မှတ်ပြီး အိတ်နဲ့နှစ်ထပ်လောက်ထုပ်ပေးပါ ၊ ကျား / မ ကို အိတ်အရောင်နဲ့ခွဲပါ။ ဒါမှဝေတဲ့အခါ မြန်မှာဖြစ်ပြီး ကျစ်ကျစ်လစ်လစ်နဲ့ သယ်လို့ရမှာပါ။

လိုအပ်သောအဝတ်အစား✅
“”””””””””””””””””””””””””””
(၁) အဝတ်အစားနဲ့အတူ အရင်ဆုံးစဉ်းစားရမှာက အတွင်းခံပါ ၊ အမျိုးသား ၊ အမျိူးသမီးအတွင်းခံတွေ လိုပါတယ်။ အင်္ကျီ ဘောင်းဘီတွေထက် အတွင်းခံစိုပြီး လဲစရာမရှိရင် ယားနတွေ ခဏလေးဖြစ်နိုင်ပါတယ် ၊ အထူးသဖြင့် အမျိုးသမီးတွေပိုလိုပါတယ်။

(၂) အမျိုးသမီးတွေအတွက် ဂွမ်းထုပ် (Pad) လိုပါတယ်။ ဒါသိပ်ပြောတာမတွေ့လို့ပါ။ ဖြစ်နိုင်ရင် အမျိုးသမီးအတွက် အဝတ်ထုပ်တိုင်း မှာ Pad လေးတွေတစ်ခါတည်းထည့်ပေးပါ။ စိုထိုင်းတဲ့ပတ်ဝန်းကျင် ၊ အဝတ်အစားမရှိတဲ့အချိန်မှာ ဓမ္မတာလာတဲ့ ဒုက္ခမသေးပါဘူး။

(၃) လုံချည် ၊ ထမီ အရမ်းအသုံးဝင်ပါတယ်။ အတို ၊ အရှည်လုပ်ဝတ်လို့လည်းရသလို ၊ ခေါင်းအုံး၊ အခင်း ၊ စောင်အနေနဲ့ပါ All in one အသုံးပြုနိုင်ပါတယ်။ ပစ္စည်းတွေကို ထုပ်ပိုးလို့လည်း ရသလို လွယ်ကြိုး ၊ ပုခတ် အပြင် ကလေးငယ်နဲ့ အသက်ကြီးသူတွေကို ကယ်ထုတ်တဲ့နေရာမှာပါ ပုဆိုးကို Harness (သိုင်းကြိုး) အနေနဲ့သုံးလို့ရပါတယ်။

(၄) နေမလိုပဲ ခြောက်လွယ်တဲ့ Quick dry အင်္ကျီလေးတွေကပိုအသုံးဝင်ပါတယ်။ အလွယ်မြင်အောင်ပြောရရင် အားကစားတီရှပ်ပါ ၊ ဘောလုံးသမားတွေဝတ်တာမျိုးပေါ့။ ရေစိုနေရင်တောင် လူဝတ်ထားလိုက်ရင် နာရီဝက်လောက်နဲ့တင်ခြောက်ပါတယ်။ ရိုးရိုးတီရှပ်လည်းရပါတယ်။

(၅) အရောင်တောက်တောက်အဝတ်အစားတွေက ကယ်ဆယ်ရေးသမားတွေအလွယ်တကူရှာတွေ့ဖို့ အထောက်အကူပြုပါတယ်။

(၆) အနွေးထည်ပါး ၊ ဖလန်နယ်တွေ အဆင်ပြေပါတယ်၊ ပေါ့ပေါ့ပါးပါးဖြစ်သလို ကျားကောမကောဝတ်လို့ရပါတယ်။ ညဘက်တွေမှာ နွေးနွေးထွေးထွေးနေဖို့လိုပါတယ်။

(၇) ဘောင်းဘီရှည် ၊ တို အဆင်ပြေပါတယ်။ အတိုဆိုတဲ့နေရာမှာ ပေါင်တိုတွေကိုပြောတာမဟုတ်ပါဘူး ၊ ဒူးဖုံးလောက်အတိုဆုံးပဲကောင်းပါတယ်။ ပေါင်တိုတွေက လူကိုအနွေးဓာတ်မပေးနိုင်သလို ၊ တစ်ခုခုနဲ့ခြစ်မိ ခိုက်မိတာကိုမကာကွယ်ပေးနိုင်ပါဘူး။ အခြောက်မြန်တဲ့ အားကစားနဲ့ တောင်တက်ဘောင်းဘီတွေက ခြစ်ရာပွန်းရာ ဒဏ်ခံနိုင်သလို ၊ ရေလည်းအရမ်းမစုပ်တဲ့အတွက် ရေစိုရင်တောင် ဒုက္ခမများပါဘူး။

(၈) ပလက်စတစ်မိုးကာ ၊ ဒါကတော့ Option ပါ ၊ ရေကြီးတဲ့နေရာတွေမှာ မိုး ၊ ရေ ၊ လေ တွဲပါတတ်ကြပါတယ်။ ပလက်စတစ်မိုးကာတွေက မိုးကာ (Rain cover) အနေနဲ့ကော wind proof (လေကာ) အနေနဲ့ပါအသုံးဝင်ပါတယ်။ ဒီဟာကတော့ အမိုးအကာကောင်းကောင်းရှိသူတွေအတွက်မရှိမဖြစ်မဟုတ်ပါဘူး။

မလိုအပ်သောအဝတ်အစားများ ❌
“”””””””””””””””””””””””””””””””””
(၁) ဂျင်းဘောင်းဘီ အဆင်မပြေပါ။ ဂျင်းတွေက ရေအရမ်းစုပ်တဲ့အတွက်ကြောင့် ရေထဲဖြတ်ရင် လေးပြီးဆွဲနေသလို ၊ ရေနက်တဲ့နေရာမှာဆိုရင် ရေကူးကျွမ်းတဲ့သူတောင် ဂျင်းဘောင်းဘီနဲ့ဆို ကြာကြာမကူးနိုင်ပါဘူး။ နောက်ပြီး ဂျင်းဘောင်းဘီအရှည်နဲ့ လမ်းကြာကြာလျှောက်တဲ့အခါ ဒူးကောက်ကွေးနေရာတွေမှာ ပွန်းပြီးဒဏ်ရာရပါတယ်။

(၂) ကြိုးတစ်လုံး အင်္ကျီတွေအဆင်မပြေပါဘူး ၊ ဝတ်ရတာ သက်တောင့်သက်သာမဖြစ်သလို ၊ လုံလည်းမလုံပါဘူး။

(၃) ဘောင်းဘီအတို အပြတ်တွေ လည်းအဆင်မပြေပါဘူး။ လုံခြုံပြီး နွေးထွေးတဲ့အဝတ်အစားမဟုတ်လို့ပါ။ တစ်ခုခုနဲ့ခြစ်မိ ရှမိမှာကိုလည်း မကာကွယ်နိုင်ပါဘူး။ ဒူးဖုံးအဝတ်အစားတွေက ပိုအဆင်ပြေပါတယ်။

(၃) အနွေးထည်အထူ ၊ ဆွယ်တာအင်္ကျီတွေ မထည့်ပေးပါနဲ့ နေရာအရမ်းယူသလို သယ်ရလည်းခက်ပါတယ်။ အလွယ်မခြောက်သလို ရေစိုရင်လည်း အရမ်းလေးပါတယ်။ အဲဒီအစား အပေါ်မှာပြောသလို ဖလန်နယ်ပေါ့ပေါ့ပါးပါးလေးတွေက ပိုအသုံးဝင်ပါတယ်။

(၄) ကျွန်တော်တို့ အဝတ်အစားတွေ စီစစ်တုန်းက ဟောင်းနွမ်း၊ စုတ်နေတဲ့ အဝတ်အစားတွေ ခဏခဏပစ်ထုတ်ရပါတယ်။ အဲဒါတင် ဆာလာအိတ်တစ်အိတ်မကပါဘူး။ ဒုက္ခရောက်သူတွေကို ကိုယ်တောင်မဝတ်တဲ့ အဝတ်အစားတွေမပေးစေချင်ပါဘူး။

(၅) ဘေထုပ်တွေတချို့လှူကြတာရှိပါတယ်။ ကောင်းပါတယ်​ ဒါပေမယ့် ပုဒ်ပြတ်ဝယ်ပြီး အထုတ်လိုက်ကို မစစ်အလှူခံဌာနတွေဆီပို့တဲ့အခါ ဝတ်လို့မရတာတွေ ၊ အရမ်းနံပြီး မှိုစွဲနေလို့ ဘယ်လိုမှသုံးမရတာတွေပါလာတတ်ပါတယ်။ ဘေထုပ်လှူရင်လည်း အထည်စစ် ၊လျှော်ဖွတ်ပြီးမှုလှူစေချင်ပါတယ်။ မှိုတက်နေတဲ့အင်္ကျီတွေဝတ်ပြီးမှ အရေပြားပြဿနာတွေဖြစ်စေချင်မယ်မထင်ပါဘူး။

အဝတ်အစားလှူဒါန်းတယ်ဆိုဝာာ လိုအပ်သူတွေ အဆင်ပြေပြီး သက်တောင့်သက်သာဖြစ်စေဖို့ပါ။ မလှူခင်မှာ အကယ်၍ကိုယ်သာဆိုရင် ဒီအဝတ်အစားကို ဝတ်ဖြစ်မှာလားဆိုတဲ့အတွေးလေးနဲ့ လှူစေချင်ပါတယ်။ ဒါကတော့ ကျွန်တော့်ရဲ့အတွေ့အကြုံကို ပြန်မျှဝေပေးတာပါ။ အားလုံးအဆင်ပြေကြပါစေ။

Credit

Send a message to learn more

အမျိုးတို့ရေ မီတာခတက်ပြန်ပြီကွယ်