She Stories

ပုံမှန် ကြိုးစားနေတဲ့သူတွေ အောင်မြင်ကုန်ပြီ
အောင်မြင်ဖို့ ကြိုးစားနေကြတဲ့လူတွေ အတော်များများ ကြုံနေရတဲ့ အခက်အခဲတစ်ခု ရှိပါတယ် ပထမတစ်ရက်မှာ စိတ်ဓာတ်‌တွေ အရမ်းတက်ကြွပြီး အစီအစဉ်တွေဆွဲတယ် အခက်အခဲနဲ့ ကြုံရင်လည်း ရင်ဆိုင်ကျော်ဖြတ်ဖို့ ကြိုးစားတယ် ဒါပေမဲ့ လေးငါးဆယ်ရက်လောက် ကြာလာတဲ့အချိန်မှာ တက်ကြွနေတဲ့စိတ်တွေ အနာဂတ်အစီအစဉ်ဆိုတာတွေ အကုန်ပျောက်သွားပါတယ် နေ့တဓူဝ လှုပ်ရှားရုန်းကန်ရင်း ခြေကုန်လက်ပန်းကျပြီး အနာဂတ်အစီအစဉ်ဆိုတာ ဘာမှန်း မသိတော့ပါဘူး ကိုယ်က ရပ်တန့်လိုက်တော့မယ်လို့ မရည်ရွယ်ပေမယ့် ဘာမှ ဆက်မလုပ်ဖြစ်တော့ဘူး အဲဒီအချိန်မှာ ကိုယ့်ကိုယ်ကိုယ်ပဲ အပြစ်တင်မိတယ် 'ငါ ဘာတွေမှားနေတာလဲ ဘာဖြစ်လို့ ပုံမှန်မလုပ်နိုင်ရတာလဲ'ဆိုပြီး အကြိမ်ကြိမ် ပြန်မေးနေမိတယ် ကိုယ့်ကိုယ်ကိုယ် အပြစ်တွေတင်ပြီး ငါက ဘာမှ ဖြစ်မြောက်အောင် မလုပ်နိုင်တဲ့သူလားဆိုတဲ့ အတွေးမျိုး ဝင်လာတတ်တယ်
ဒီပြဿနာက ကိုယ့်ရဲ့အမှားကြောင့် ဖြစ်ရတာ မဟုတ်ပါဘူး စိတ်တက်ကြွနေတဲ့အချိန်မှာ ထပြီး ကြိုးစားတတ်တဲ့ကိုယ့်ရဲ့အကျင့်ကြောင့်ပါ စိတ်ပါတဲ့အချိန်မှသာ တိုးတက်အောင်မြင်ဖို့ ကြိုးစားတတ်ပြီး စိတ်မပါတော့တဲ့အချိန်မှာ အားလုံးကို ပစ်ထားတတ်တာကြောင့် အောင်မြင်မှုနဲ့ ဝေးနေရတာပါ ကျွန်မတို့ရဲ့ စိတ်ခံစားချက်တွေနဲ့ အခြေအနေတွေဆိုတာကတော့ နေ့တိုင်း ပြောင်းလဲနေတာပါ တခြား ဘာအလုပ်မှ လုပ်စရာမရှိမှသာ တိုးတက်ဖို့ အလုပ်တွေကို လုပ်မယ်ဆိုရင် မအားတော့ဘူးဆိုရင် ဘာမှ လုပ်ဖြစ်တော့မှာ မဟုတ်ပါဘူး အဲဒါကြောင့် စည်းကမ်းတကျ လုပ်တတ်တဲ့အကျင့်ကို ပြုစုပျိုးထောင်ထားပါ
အောင်မြင်ချင်တယ်ဆိုရင် ပထမဦးဆုံးအနေနဲ့ ခံစားချက်တွေပေါ်မှာ မူတည်ပြီး အလုပ်လုပ်တဲ့အကျင့်ကို အရင်ဆုံး ပြင်ရပါမယ် ခံစားချက်ဆိုတာ ယုံကြည်အားထားလို့ရတာမဟုတ်ပါဘူး
တစ်နေ့စာအတွက် ကိုယ်နိုင်သလောက် အလုပ်လေးတွေကိုပဲ ပုံမှန်လုပ်သွားပါ တစ်နေ့ကို တစ်နာရီ သို့မဟုတ် နှစ်နာရီစာ အချိန်ပေးနိုင်သလောက်ပဲ နေ့တိုင်းပုံမှန်လေး လုပ်သွားပါ အလုပ်လုပ်ရမယ့်အချိန်ရောက်လာရင် ကျန်တာ ဘာတွေပဲ ဖြစ်နေနေ ဂရုစိုက်မနေဘဲ စည်းကမ်းတကျ လုပ်သွားနိုင်ဖို့သာ အရေးကြီးပါတယ်
စစ်တမ်းတွေအရဆိုရင် အလုပ်တစ်ခုကို ပုံမှန်လုပ်သွားရင်း ၁၈ ရက်ကြာရင် အရာအားလုံး ပြောင်းလဲသွားပါပြီ အရင်တုန်းက စိတ်ပါမှ လုပ်တတ်ပြီး စိတ်မပါတော့တာနဲ့ ပျက်စီးသွားခဲ့ရတဲ့ အလုပ်တွေကို ၁၈ ရက်ကြာအောင် တောက်လျှောက်လုပ်နိုင်ခဲ့ပြီဆိုရင် ကိုယ့်ရဲ့ ခံစားချက်တွေ အခြေအနေတွေကို ထည့်စဉ်းစားစရာမလိုတော့ဘဲ လုပ်နိုင်နေပါပြီ
ရက် (၉၀) အကြာမှာတော့ ကိုယ့်ကိုယ်ကိုယ် 'ငါက ဘာလုပ်လုပ် ဖြစ်အောင် လုပ်နိုင်တဲ့သူ ငါ့ကိုငါ ပေးတဲ့ကတိတွေက တကယ်ကို တန်ဖိုးရှိတယ်' ဆိုတဲ့ ယုံကြည်မှုမျိုးကို အပြည့်အဝ ရရှိလာမှာပါ ဒါတွေအားလုံးက အလုပ်တစ်ခုကို ပုံမှန်လုပ်သွားခဲ့တဲ့အတွက် ရရှိလာတဲ့ အကျိုးကျေးဇူးတွေပါ အောင်မြင်တဲ့ ပုဂ္ဂိုလ်တစ်ယောက် ဖြစ်ချင်တယ်ဆိုရင် ကိုယ့်ကိုကိုယ် တန်ဖိုးထားဖို့ ကိုယ်က ပြောတဲ့အတိုင်း ဖြစ်အောင် လုပ်နိုင်တဲ့သူဆိုတာမျိုး ကိုယ့်ကိုယ်ကိုယ် ယုံကြည်ဖို့ အရေးကြီးပါတယ်

အဝတ်အစားက လူတစ်ယောက်ရဲ့ ကံတရားကို အတိုင်းအတာတစ်ခုအထိ ဆုံးဖြတ်ပေးနိုင်တယ်ဆိုတာ လက်ခံပါသလား

ကျွန်မတို့ ပုံမှန် ကြုံနေရတဲ့ ကိစ္စတစ်ခုရှိတယ် ဒါပေမဲ့ ဘယ်သူမှတော့ ဝန်မခံချင်ကြဘူး လူတစ်ယောက်ကို ပထမဦးဆုံးအကြိမ် စမြင်လိုက်တဲ့စက္ကန့်ပိုင်းအတွင်းမှာ စကားတစ်ခွန်းမှ မပြောရသေးခင် သူ ဘယ်လိုလူလဲဆိုတာကို သူ့ရဲ့ ဝတ်ပုံစားပုံကို ကြည့်ပြီး ဆုံးဖြတ်တတ်ကြတယ်
ပါးစပ်ကတော့ အဆင့်အတန်းမခွဲပါဘူးလို့ ကိုယ့်ဘာကိုယ်တောင် ပြန်မယုံနိုင်တဲ့ စကားတွေကို ပြောတတ်ကြပေမယ့်ပေါ့ ဒါက ပကာသနတွေအကြောင်း ပြောနေတာ မဟုတ်ဘူး အဲဒီထက်ပိုပြီး နက်နဲပါတယ် အဝတ်အစားတွေကြည့်ပြီး ကိုယ့်ရဲ့အဆင့်အတန်းက ဘာလဲ
ကိုယ် ဘယ်လိုလူမျိုးလဲဆိုတာကို ကမ္ဘာကြီးက အသံတိတ်နည်းနဲ့ ဆုံးဖြတ်နေတာပါ လူတွေရဲ့ အမြင်ကို ကိုယ့်ဘက်ကတော့ ဂရုမစိုက်ပေမယ့် ကိုယ့်ရဲ့ ရုပ်ရည်သွင်ပြင်နဲ့ ပတ်သတ်ပြီး ဖြစ်သလိုနေမယ်ဆိုရင် ကိုယ့်ရဲ့ အရည်အချင်း အစစ်အမှန်ကို ဘယ်တော့မှ ပြသနိုင်မှာ မဟုတ်ပါဘူး
ခါးသီးတဲ့ အမှန်တရားတစ်ခုကတော့ လူတစ်ယောက်ရဲ့ ရုပ်ရည်သွင်ပြင်က အခွင့်အရေးတွေကို ဖန်တီးပေးနိုင်တယ်ဆိုတာ အမှန်ပါပဲ အောင်မြင်လာဖို့ဆိုရင် လူတစ်ယောက်မှာ အရည်အချင်းရှိဖို့ လိုပါတယ် ဒါပေမဲ့ ဝတ်ပုံစားပုံကလည်း ကိုယ့်ရဲ့ အရည်အချင်းနဲ့ ကိုက်ညီဖို့ လိုပါတယ်
မတရားဘူးဆိုပေမဲ့ အမှန်တရားပါ အဝတ်အစားကို သပ်သပ်ရပ်ရပ်ဝတ်စားလိုက်ရင် ကိုယ့်ကိုယ်ကိုယ် ပိုပြီး ယုံကြည်မှု ရှိလာတာကို ခံစားဖူးကြမှာပါ လူတွေကလည်း ကိုယ့်အပေါ်မှာ ဆက်ဆံတဲ့ပုံစံ ပြောင်းလဲသွားမှာပါ ကိုယ့်ကိုယ်ကိုယ် သပ်သပ်ရပ်ရပ်နေတတ်တဲ့သူကိုသာ လူတွေက လေးစားယုံကြည်ကြမှာပါ ဒီနေရာမှာ အရမ်း ဈေးကြီးတဲ့ အဝတ်အစားတွေကို ဝတ်ရမယ်လို့ မဆိုလိုပါဘူး အဝတ်အစားကို သပ်သပ်ရပ်ရပ် ဝတ်ဖို့နဲ့ ခြေသည်းလက်သည်းကို သန့်သန့်ရှင်းရှင်းထားဖို့ဆံပင်ကို သေသေသပ်သပ်ထားဖို့ လိုပါတယ် အသေးစိတ်ကို ပြင်ဆင်ထားဖို့ အရေးကြီးပါတယ် လူတွေကြားထဲမှာ ထင်ရှားမနေတဲ့သူကို ဘယ်သူမှ သတိထားမိမှာ မဟုတ်ပါဘူး အညတရဘဝနဲ့ ကိုယ့်ကိုယ်ကိုယ် မရောင့်ရဲလိုက်ပါနဲ့