Akha Newcreation Studio

Guv-eu jeq hawr-eu shir-eu jeq anr uvlanr eu
27-06-2026 การปกครองเหนือความกลัวและความตาย

“Zaq khoerdeuq shiq hawr-eu shaqjir piluf-eu lof-aer, aqyawf khawf aqyawfmaf lof-aer durni daefle-euq mae. Aqyawf shir-awr, shir-eu jeq-anr uvlanr-eu naef sanqpaq-euq baoq-anr lavcawv le-euq mae. Khoeruqtaf, shir-eu jeq-anr guv-eu mirnae, tiqzir zirlanni bi paftawf taq-euq tsawrhaq deuq-anr pyaeqnaeq-eu gharduq, aqyawf khoerlof-aer mr-euq mae.”
(‭‭Heqbyaer‬ ‭2‬:‭14‬-‭15‬)

Aqdui nae gui-euq yaerbof ardeuv heu-aq, marjawv ni ghae-awr zifdan ni ghae-eu mae, Khoer-aq. Sanqpaq Yeqsur shir-eu jeq-anr uvlanr-eu ghaq-eu baoq-anr lavcawv le-euq mae, khoer-aq. naef saqdaq mae, khoernar-aq, Aqyawf tsawrhaqzaq-anr shir-eu jeq-anr guv-eu garnae puir pyaeqnaeq-euq mae, Aqyawf aqdui-anr tiqpaw dzerdzaq-anr navtaef-aer bi ghaqler-euq taef maqngeur-a, Sanqpaq Yeqsur nae mr-euq gar khoer-aq, maqmr ghaq-euq maqngeur-a, Sanqpaq Yeqsur aqyawf shir-eu jeq-eu baoq ‘anr-eu naef saqdaq-anr dawqtawv luf ghaqler jir-euq mae

(‭‭2 Tivmorseq‬ ‭1‬:‭10‬) lafkhoer aer-eu
…Aqyawf guiqlanq dawq-anr ghoe-awr shir-eu jeq-anr lavbyov-awr, daef-eu jeq hawr-eu maq shirnya-eu jeq yurlef-awr byacaevni bimawr naeqlaf-euq mae.laer aertaq-euq mae, Sanqpaq yeqsur shir-eu jeq-anr daef-eu jeq hawr-eu maq shirnya-eu jeq nae lavdan naeqlaf-euq mae, Haleluya! Heu-aq jan-eu guiqlanq dawq mae, Heu-aq. laqkhaq caer-eu guiqlanq dawq mae, shir-eu jeq bi lavcawv-euq mae

Sharnoeq hawsher-eq, ghaqkhaer deuq aqyawfmaf 'ghaq maqanr-eu mirnae shir-euq maqngeur-a, Miqyaer-euq yaerbof lafkhoer aertaq-euq aqyawfmaf mirtsaq tanqkhawr-anr nae ghawq-ir-euq khoer-aq, Miqyaer nae aqyawfmaf-anr kurtaq-euq jeq pyeuf-awr aqyawfmaf-eu shiq nae guiqlanq dawq-eu jmq diqtaq-euq mae laer aertaq-euq mae, aqyawfmaf yawqhar yawqha-euq daefzir damqnaeq-euq mae, shir-eu jeq aqyawfmaf-eu daefzir-anr baoq maqjav-a

Kalizaq-eu daefzir-aq, ghaqler-euq daefzir mae, a’lawv lawv-aer shir-awr buf-ir shov-ir nya-eu jeq-anr hageuf-eu maqngeur-a, Nawq-eu lafkhoer ur-eu Miqyaer-euq daef-eu jeq khoer maqbuf maqshov-ir nya-a, Aerkhawf Miqyaer-eu zaq pyeufmae, Khoer-aq, maqshir nya-eu jeq mae, khoer-aq, maqcawv-ir nya-a, Nawr-aq, shir-eu jeq-anr nae buq-ir-euq mae, Teubaqda mirnae aqmyanluf Kalieuq lafkhoer ghaqler-euq gar yawdaef daef-awq, maqguv ni ghaqkhav-eu lafkhoer daef-awq

mr-eu jan-eu dawq
Ngar-aq, guv-eu jeq maqanr ni khaqduq ni ghae-eu ma, Sanqpaq Yeqsur-aq shir-eu jeq hawr-eu guv-eu jeq-anr lavcawv-awr maq shirnya-eu jeq bifnaeq laf-euq mae laer aqmyanluf noeqkeuv-eu ma, Ngar-aq, Kali-euq lafkhoer ghaq khav-eu gar, jawrshar dov-eu gar, yawshaef khanqsaer lafkhoer lafkhoer hawr-eu ghaqler-eu lafkhoer yawdaef daef-eu ma, Aqmeq

Heugar guilanq nya-eu mae
Heqbyaer 2:14-15/ 2Tirmorseq 1:10/ Yorhaq 11:25-26/ 1Gawrly15:55

Nawq-eu lafkhoer yawshaef khanqsaer ur-eu mae
20-06-2026 มีพระสิริอยู่ในคุณ

“Aqyawfmaf ngaq-eu tsawrhaq ma, ngaq-eu yawshaef khanqsaer bi dovlar ni, aqyawfmaf-anr Ngar, bae-euq ma
(Irsaqyar 43:7)

Nawr, siqnya malaq? Nawr, mirtsaq khoertav daefle-euq-aq, Miqyaer-euq yawshaef khanqsaer byaqdov naeq-eu gharduq daefle-euq mae, Nawr, mirtsaq khoertav nae yawbae ghaq pyeuf-awr, muiqdui dui-eu ghaq pyeuf-eu mae, Nawr-aq Miqyaer-euq lafkhoer zawr-aer muiq-eu jeq pyeuf mae, Miqyaer-euq gharduq-aq, nawq-eu lof-aer tiqghaq-iq maqdur-a, khoer-aq nawq-eu muiqdui jeq mae, Teumirnae maq pyeufler nya-eu jeq-anr taq hageuf, Nawr, nawq-eu yawfjir khoergar nae oe-euq-aq laeq-ir-euq jeq maqngeur-aq, Nawq-eu yawshaef khanqsaer ur-eu mae

Nawq-eu lafkhoer huiqdui dui-eu tiqjeq nav ur-eu mae, mirkhanq-anr lavpar nya-eu jeq ur-eu mae, ‭‭(2 Gawrliqtu‬ ‭4‬:‭7‬) lafkhoer aer-eu “Huiq-awr muiq-eu baoq heu-aq, nga’maf-anr nae maqngeur-eu, Miqyaer-anr nae dovle-euq ngar-a laer bisiqni, nga’maf poeq-eu myawqganq heu, mirtsaq oeqlanq-euq lafkhoer anrluf-eu ma.”laer aertaq-euq mae, Nymq-mr nawr. maeqcoeq zeurdm-eu pyur ma’anr-eu dur, maqngeur nar-aq irkanr arpoeq bif-eu maq’anr-eu dur! Nawr, yawqha-euq laer tiqjeq-iq maqjav-awr sufti ni ghae-eu nymr ngaq-awr nae jawrluf-eu dur! Aerkhawf khoer-aq beugar-eu jeq maqngeur-a, yawqjeq navluf nawq-eu pyeuf mae, (1Gawrliqtu 3:21)

Miqyaer aqdui-anr mqtav mirkhanq-anr jav-eu saflar paw-euq guiqlanq yawqjeq navluf, Kali-euq lafkhoer aqdui-anr bifnaeq laf-euq mae.”
(‭‭Erpersu‬ ‭1‬:‭3‬) mqtav mirkhanq nawq-eu nuima lafkhoer jav-eu mae,
(Dawqtsov 3:11) lafkhoer aer-eu
Yawqjeq navluf-eu gharduq, Aqyawf nae yamqlaw tovtsaq taq-euq mae,
Aqyawf Mqmaq maqbyav yarzir pyeuf-eu jeq tsawrhaq-eu nuima-euq lafkhoer dawv’anr taq-euq mae (THSV) …. laer aertaq-euq mae, Nawq-eu lafkhoer paw haw’ur lef-awr, Miqyaer-euq yaerdawq nae nawq-anr lafkhoer paw nae bibae-awq

Nawq-eu lafkhoer poeqdui lawqdui dui-eu jeq ‘ur-eu mae, shuir jav-eu daema khoer-aq, pov-awr nae hawr mawrnya-eu mae, khoer-aq Miqyaer-euq yaerdawq nawq-anr mrnaeq-euq jeq pyeuf mae, Nawr, aqsur ghaq pyeufmga laer panmaeq laf-euq mae, nawq-eu lafkhoer ur-eu jeq-anr panmaeq laf-eu uqtaf kali-euq lafkhoer Nawr, ghaq khav-awr ghaqler-eu lafkhoer yawdaef aqjox-aer yadaef-eu nga laer panmaeq laf-eu mae, Nawr-aq Miqyaer-euq yawshaef khanqsaer mae, Teumirnae cawq turlar-awr nae yawshaef bya-awq
Miqyaer guiqlanq-anr jaceuq ma.


Ngamaf-anr Gaqdui dui-eu Aqda Miqyaer-or, nawq-eu yawshaef khanqsaer gharduq ngamaf-anr bae-euq mirnae guiqlanq huiqma, ngamaf-aq, nawq-eu gharduq bi tserdov taq-euq ma, Miqyaer-euq yaerdawq-aq ngamaf-eu lafkhoer ur-eu myawqganq yurdov lef-eu mae, Ngamaf yawshawr saflar pawnae ngamaf khar-ir-eu gar Miqyaer-euq muiq-eu jeq, gaq-eu jeq, hawr-eu yawshaef khanqsaer byaqhaw naeq-eu tsawrhaq ma, Ngamaf maq pyeufler nya-eu jeq-anr maq hageuf ngamaf-aq aqmyanluf Miqyaer-euq yawshaef khanqsaer gharduq byacaevni daef-eu ma, Yeqsur Kali tsawrmyanr lafkhoer nae shar-eu ma, Aqmeq

Heugar guilanq nya-eu mae
Yeqlaqmir 1:5/ 2Gawrliqtu 4:7/ Maqtaeq 5:14