Akha Newcreation Studio

Guiqlanq, yawshaef khanqsaer hawr-eu muiq-eu daefzir
21-05-2026 ชีวิตแห่งพระพรพระสิริและความเป็นเลิศ

“Aerkhawf, nawmaf-aq, Miqyaer nae tserdov taq-euq heuzir-euq tsawrhaq pyeuf-awr, sanqpaq hawr-eu pirma pyeuf-eu uqtaf, shawr-eu tsawrjeuq tsawrca pyeuf-awr, aqdir Miqyaer-euq tsawrhaq pyeuf-eu mae. Khoer-aq, Miqyaer nae mr-euq jaceuq paq-aer ghae-eu garkawv, dawqdzawr bimr-eu laer nawmaf-anr yawzanr-euq lafkhoer nae kurdov-awr, zanqler paq-aer ghae-eu yawshaef-euq lafkhoer sheuqur naeqlaf-euq mae.
(‭‭1 Beqtuvluv‬ ‭2‬:‭9‬)

Nawr, kalizaq pyeuf-eu ngeurnar-aq, Nawr-aq, Nar-eu gawr-eu jeq hawr-eu Naef saqdaq-eu uqmov maqjawr-a, Aqjeqmirnae aernar-aq, Kali-euq lafkhoer Nawq-eu daefzir-aq. khoerdeuq-anr ghaqler-euq mae, Nawr, mirtsaq-eu khoertav jav-eu jeq-eu zaqkhav maqngeur-a, Aerkhawf khoerdeu navmaqtser gor-eu gar daefluf-eu mae, Ngar, Ghaqkhaer Beqtuvluv nae ngaeqtaq-euq dawq heudawq-anr zaler nya. Heulof-aer aertaq-euq mae
“Nawmaf, mirtsaq-euq khoertav jav-eu nuikhanr baqda’nae, cawv-ir-eu jeq-anr caevdzeur-awr, Miqyaer-euq shaevdzeuf tiqkawv lof-aer za-eu gharduq, aqyawf, aqdui-anr huiqdui poeq duidui-eu sarjax dzaqtaq-euq mae.” (‭‭2 Beqtuvluv‬ ‭1‬:‭4‬)

Nawr-aq, mirtsaq khoertav jav-eu buf-ir shov-ir nya-eu jeq nav maqtser gor-eu jawrduq-anr daefluf-eu mae, Aqjeqmirnae aernar-aq, Nawr-aq, Miqyaer lof-aer dur-eu Gar’mrzaq mae, Miqyaer-euq yawshaef khanqsaer-anr taf-eu tsawrhaq mae, Nawr-aq, mirtsaq khoertav zanrtsui ni bighae ir-euq naef saqdaq nav maqtser huiqdzaeq-eu mae
Nawq-eu daefzir-aq, Miqyaer-euq Guiqlanq, yawshaef khanqsaer, hawr-eu Miqyaer-euq dawr-eu tsaq-eu jeq byan-eu mae, Nawr-aq. Kali-euq lafkhoer zawr muiq-eu daefzir ‘anr-eu mae

Sharnoeq haw sher-eq, zawr muiq-eu yaerbof uqdzan bof-euq Beqtuvluv heughaq dzeurlaf ngae guv-eu lafkhoer Yeqsur-anr maq siqnya laer aer-euq mae, Aerkhawf aqyawf yawshawr saflar za-euq nar-aq, tiqjeqpaq par-ir-euq mae, Aqyawf yawshaef khanqsaer lafkhoer nae Miqyaer-euq daef-eu jeq aqyawf-eu daefzir pawnae byaqdov-euq mae, hawr-eu aqyawf maqguv ni nuima khaqduq ni dawqmaeq maeq-awr tsawrha smqpar ghaq aerghaq ni Yeqsur-anr janlar-euq mae, Ghaqkhaer 2:41 guiler nyamae

Aqjeq nae Aqyawf-anr lavpar-euq la? Aqyawf Kali-euq lafkhoer ur-eu yawshaef khanqsaer huiq-eu daefzir khoer arnav ni muiqnga laer ya siqnya-euq mae, Nawq-eu mawrdo lafkhoer coqdzae-eu jeq maqjav-a, Ghaq baq-eu jeq maqjav-a, hawr-eu yawzanr maqjav-a, Aerkhawf Guiqlanq, muiqdui dui-eu jeq, byankuf-eu jeq hawr-eu yawshaef khanqsaer taef-aer jav-eu mae, (1Beqtuvluv 3:9) lafkhoer Miqyaer nawqmaf-anr Guiqlanq-eu jeqbif biza-eu laer kurtaq-euq mae, Ghaq baq-awr safdawr-ir paq-aer maqngeur-a, Heu-aq, Kali-euq lafkhoer nawqnae za-euq daefzir mae, Khoer-aq, nar-eu gawr-eu jeq, naef saqdaq, irshaq shaq-eu jeq, hawr-eu shir-eu jeq-anr uvlanr-eu daefzir mae, Miqyaer guiqlanq-anr jaceuq ma


Ngamaf-anr Gaqdui dui-eu Aqda Miqyaer-or, Yeqsur Kali lafkhoer Ngamaf-anr bifnaeq laf-euq yawshaef khanqsaer-euq daefzir gharduq guiqlanq huiqma, Ngamaf-aq, Guiqlanq baw-eu daefzir, muiq-eu daefzir, jawrshar dov-eu daefzir, ghaqler-eu daefzir, ghaqkhav-eu daefzir lafkhoer canluf-eu ma, Ngamaf Nawq-eu dawr-eu tsaq-eu jeq, hawr-eu byankuf-eu jeq mirtsaq khoertav byaqhaw naeq-eu ma, Ngamaf-aq, nar-eu gawr-eu jeq, Ghaqbaq-eu jeq, hawr naef saqdaq-anr ghaqler-euq ma, Aqjeqmirnae aernar-aq. ngamaf Yeqsur Kali-euq lafkhoer jawr-eu ma, Yeqsur Kali tsawrmyanr lafkhoer nae shar-eu ma, Aqmeq

Heugar guilanq nya-eu mae
2Beqtuvluv 1:3/ Gawrlawrsaer 1:13/ Lormav 8:37

Miqyaer-anr taqngaeq coeq
15-05-2026 อย่าพูดต่อต้านพระเจ้า

Sanqpaq Miqyaer aer-eu "Ngaq-anr coeqdui duilar-eu dawq nawmaf ngaeq-euq mae, Aerkhawf ngamaf nawq-anr aqjeq aertaq-euq jav-eu la laer nawmaf aer-eu mae
(Maqlaqkir 3:13)

Aqdui nae gui-euq yaerbof ardeuv heu-aq, sarnoeq paq-aer ghae-eu jeq jav-eu mae, Miqyaer Maqlaqkir pawnae aer-eu, Ngaq-anr coeqdui duilar-eu dawq nawmaf ngaeq-euq mae. laer aer-eu mae, tsawrhaqzaq Miqyaer-anr coeq-eu dawq ngaeq-eu gar sarnoeq hawsher-eq, Aerkhawf aqyawfmaf maq siqnya-eu lafkhoer narhaq-eu, “Ngamaf nawq-anr aqjeq aertaq-euq jav-eu la? laer aer-eu mae, Aqyawf maf ngaeqluf dawq khoer Miqyaer-euq yaerdawq naeq-aer maqtsaq nga laer aqyawfmaf maq siqnya-a, garkawv heu nymq-mr keuvni pyeuflar luf-eu mae

Tsawrhaq ghawqmya ghaq maq siqnya ni dawq pawnae Miqayer-anr ngaeqcoeq luf-eu mae, Aqyawfmaf Miqyaer nae aqyawfmaf-eu gharduq aertaq-euq jeq-anr lavcoeq luf-eu mae, yawjeq maqjeq,Yaerbof-eu lafkhoer Yawmuiq jawrshar dov-eu jeq-aq kali-euq lafkhoer nawq-eu saevdzeuf mae laer aertaq-euq mae, Aerkhawf tsawrhaq ghawqmya ghaq yawqjawr navluf nar-eu gawr-eu jeq-anr taef-aer ngaeqkeuv luf-eu mae, Khoer-aq, aqdir pyeuf-eu yawtsaq yawdawr dawq-anr lavcoeq-eu jeq pyeufmae, Miqyaer-euq yaerdawq-aq, yawtsaq yawdawr dawq mae (Yorhaq 17:17)

Miqyaer-euq, yaerdawq lafkhoer aer-eu yawqjeq navluf nawmaf-eu pyeufmae”laer aertaq-euq mae, Teumirnae Ngar, pyur maqur laer taqngaeq! ”Ngar-aq Miqyaer ngaq-anr bimr mawf-eu jeq mrnya ni yawqjeq navluf jav-eu ma laer ngaeq-awq, Maeqlar-aq toeqshir toeqdaef-eu Baoq anr nga laer Miqyaer-euq yaerdawq lafkhoer nae mawrlar-eu mae,( ‭‭Dawqdaq‬ ‭18‬:‭21‬) lafkhoer aer-eu “Maeqlar-aq, toeqshir toeqdaef-eu baoq anr-eu mae. Maeqlar-euq baoq-anr gaq-eu tsawrhaq-aq, Baoq khoer-euq arsiq yadzaq-eu mae.”laer aertaq-euq mae, Nawq-eu dawq-aq. yawqngaef maqngeur-a, Nawr, Miqyaer-euq yaerdawq lof-aer ngaeqnar-aq, yawtsaq yawdawr dawq khoergar aertaq-euq jeq nawq-eu daefzir lafkhoer pyeuflar-awr zifdan ni jav-eu mae

Aerkhawf Nawr,Miqyaer-euq yaerdawq naeq-aer maqngaeq tsaq-eu nar-aq, Nawr, khawf naef saqda-anr larghov pannaeq-eu mae, Miqyaer aer-eu Ngar, nawmaf-anr maq byaerdzae laer aer-eu mae, Khoermirnae aqdui nuima khaqduq ni heulof-aer aernya-eu mae, Miqyaer-aq, ngaq-anr cawba-eu ghaq pyeuf-eu mae Ngar, tiqjeq-anr-iq maqguv”(Heqbyaer 13:5-6) Miqyaer aqdui-anr nuima khaqduq ni bighae-eu mae, Teumirnae Miqyaer-euq yaerdawq lof-aer ngaeq-awq

Heu-aq, guiqlanq saflar paw-euq garkawv mae, Nawr, garkawv heu maqgaq haw-euq nar-aq. yawshuif-anr dur-eu paq, Aerkhawf heu-aq, jan-eu daefzir pyeufmae, Miqyaer-anr ngaeqcoeq-eu tsawrhaq taqpyeuf , Nawqnae ngaeq-euq dawq nae nawq-eu daefzir lafkhoer keuvle-eu Miqyaer-euq guiqlanq-anr taq lavcoeq Miqyaer nae aertaq-euq lof-aerngaeq-awq, Heu-aq. ghaqler-eu lafkhoer daef-eu daefzir mae


Ngamaf-anr Gaqdui dui-eu Aqda Miqyaer-or, ngamaf-anr dawq ngaeq-eu Baoq paw panmaeq naeq-euq gharduq guiqlanq huiqma, Ngamaf nuima khaqduq ni heulof-aer ngaeq-eu ma, yawmuiq jawrshar dov-eu jeq, muiqlar sanrlar-eu jeq, hawr-eu ghaqler-eu jeq-aq ngamaf-eu pyeufma laer aer-eu ma, ngamaf-aq, aqmyanluf Miqayer-euq yawtsaq yawdawr dawq taef-aer ngaeq-eu ma, Ngamaf-aq, Kali-euq lafkhoer ur-eu guiqlanq nae gardzaq garkawv-anr ghaqler-eu ma, Yeqsur Kali tsawrmyanr lafkhoer nae Aqmeq

Heugar guilanq nya-eu mae
Dawqdaq 18:21/ Maqkuv 11:23/ Heqbyaer 10:23