Pajau Shiga

Lawnghkang Mare Hta Hkam Bawm A Majaw Mung Shawa Marai 3 Asak Sisum Ai Lam

Pajau Media
8 May 2026

Hpakant ginra hta hkam bawm kapaw wa ai majaw mung shawa marai 3 asak si sum wa ai lam hpe chye lu ai.

May praw 7 ya hkying 10 jan aten ram hta Hpakant Lawnghkang lambraw hta hkam da ai bawm kapaw nna asak 4 ning ma langai asak si sum wa nna marai 2 hkra hkala wa ai lam chye lu ai.

Dai hkam bawm hpe gaw myen hpyen dap kawn hkam da ai bawm rai nna, asak si sum wa ai ma gaw Lawnghkang mare na re ai lam hte mung shawa lahkawng mung grai sawng hkra hkala ai hpe chye lu ai.

Hpakant ginra hta ndai laman KIA pawng hpawm dap hte myen hpyen dap ni a majan matut byin nga nna, hpyen dap kawn laknak kaba matut na gap ayai nga ai sha n-ga mung shawa asak hkra hkala, si sum ai mung jahkring hkring byin nga ai re.

Dai sha n-ga Hpakant ginra kata myen hpyen dap hte P.T.Ts pawng hpawm hpung ni gaw mung shawa ni a grumhpraw, lung seng, cycle, mawdaw zawm re ai manu dan arai ni hpe mung shanhte ra ai hku kashun zing la nga ai hpe chye lu ai.

Shiga-Htu Seng

============================================================
Shiga yu mung chying mung masha ni hku nna tinang a grup yin hta byin nga ai mabyin masa ni, lak lai ai shiga ni, shiga sumpha laika ni hte ningmu ni hpe shana, shalai ya mayu ai rai yang Pajau Shiga page Massenger hku nna shing nrai [email protected] gmail ni hku nna matut mahkai shiga jaw la mai ai lam ndau shana dat ga ai. Pajau Media hku nna lawu kaw jaw da ai link ni mung shani shagu na shiga ni hpe hkap madat la mai sai lam n dau shana dat ga ai.

Telegram Link;-https://t.me/pajaumediachannelgenuinenews2023/12311?single

website ; https://www.pajau.net/

April Shata Laman Amyu Shayi Marai (44) Asak Si Sum Ai Lam

Pajau Media
8 May 2026

Myen hpyen dap a nbungli bawm hte ga lam hku htu shadut gasat ai a majaw myen mung kata na amyu shayi marai (44) asak sisum wa nna, marai (57) hkra hkala wa ai hpe Burma Women’s Union hpung kawn ndau da ai re.

Asak sisum ai hta myen hpyen dap a nbungli bawm gap gasat ai a majaw asak sisum ai marai (36) hte hkra hkala ai marai (45), ntara asak sat hkrum ai a majaw marai (4), laknak kaba gap gasat ai a majaw asak sisum ai marai (2) hte hkra hkala ai marai (6), sinat hkra ai majaw asak sisum ai marai (2) hte hkra hkala ai marai (1), hkam bawm a majaw hkra hkala ai marai (5) ni rai nna, asak (18) ning lawu amyu shayi marai (8) sha n-ga ma hkum hte re ai amyu shayi (1) lawm nga ai hpe chye lu ai.

Amyu shayi gaw asak si sum ai hta Mandalay ginra na amyu shayi marai (11) hte law htum shara rai nna, jinghpaw mung hta gaw marai (3) asak si sum wa ai re. Lai wa sai March shata hta gaw asak si sum ai amyu shayi marai (88) hte hkra hkala ai marai (54) nga wa ai re hpe chye lu ai.

Shiga-Htu Seng

Sumla - BWU
============================================================
Shiga yu mung chying mung masha ni hku nna tinang a grup yin hta byin nga ai mabyin masa ni, lak lai ai shiga ni, shiga sumpha laika ni hte ningmu ni hpe shana, shalai ya mayu ai rai yang Pajau Shiga page Massenger hku nna shing nrai [email protected] gmail ni hku nna matut mahkai shiga jaw la mai ai lam ndau shana dat ga ai. Pajau Media hku nna lawu kaw jaw da ai link ni mung shani shagu na shiga ni hpe hkap madat la mai sai lam n dau shana dat ga ai.

Telegram Link;-https://t.me/pajaumediachannelgenuinenews2023/12303?single

website ; https://www.pajau.net/

Lawnghkang Mare Hta Dai Ni Du Hkra Majan Masa Laja Nga Nna Nbungli Kawn Gasat Nga Ding Yang Re Ai Lam

Pajau Media
8 May 2026

Ndai laman hpyen masa laja nga ai Jinghpaw mung Hpakant ginra hta hpyen dap kawn dai ni May praw 8 ya jahpawt daw aten kaw na nbungli hte htim gasat nga ai lam ginra masha ni kawn chye lu ai.

Dai ni May praw 8 ya jahpawt hkying 10 ram hta Hpakant ginra Lunghkang mare kaw nga ai Malawng Maw kata "မြဥယျဉ်" lung seng company shara kaw sha n-ga Maw Si Sar hpunggyi jawng kawng, Taya kawng hte Malawng Maw makau shara hkan hta mung nbungli bawm gap gasat wa ai lam chye lu ai.

Myen hpyen dap a nbungli gap gasat ai hta dum nta nga shara htenza lam hte mung shawa hkra hkala ai mung nga ai hpe chye lu ai.

Myen hpyen dap gaw ndai laman Hpakant ginra maga de ga lam hku htu shadut gasat nga ai sha n-ga ginra kata bawm hkam ai ni, laknak kaba gap shadam ai ni, nbungli bawm gap gasat ai ni matut na galaw nga ai hpe chye lu ai.

Shiga-Hpring

============================================================
Shiga yu mung chying mung masha ni hku nna tinang a grup yin hta byin nga ai mabyin masa ni, lak lai ai shiga ni, shiga sumpha laika ni hte ningmu ni hpe shana, shalai ya mayu ai rai yang Pajau Shiga page Massenger hku nna shing nrai [email protected] gmail ni hku nna matut mahkai shiga jaw la mai ai lam ndau shana dat ga ai. Pajau Media hku nna lawu kaw jaw da ai link ni mung shani shagu na shiga ni hpe hkap madat la mai sai lam n dau shana dat ga ai.

Telegram Link;-https://t.me/pajaumediachannelgenuinenews2023/12298?single

website ; https://www.pajau.net/

Mungshawa Ninghkap Nga Ai Lapran Kaw Na Malizup Madim Masing Galaw Na Matu 16 Lang Ngu Na Zuphpawng Matut Na Galaw Ai Lam

Pajau Media
7 May 2026

Mungshawa hte rudi wuhpung wuhpawng ni ninghkap ai lam ni nga taw ai rai tim Malizup Madim hte seng ai mung shawa ningmu jahpra ga baw hte zuphpawng hpe Jinghpaw Mung, Myitkyina muklum hta bai galaw wa ai lam chye lu ai.

Lai wa sai May praw 5 ya shani hta Malizup Madim masing n galaw na matu Jinghpaw Mung shawa ni hte wuhpung wuhpawg 49 kawn jawm ninghkap laika ndau wa ai re.

Rai tim May 6 ya shani hta 16 lang ngu na zuphpawng hpe Myitkyina muklum hta Malizup Madim masing jawm galaw na matu madi shadaw ai masha lachyawk mi hte zuphpawng galaw wa ai hpe chye lu ai.

Zuphpawng hta Jinghpaw Mung hkringmang daju Hkyet Hting Nan hte Mungdaw asuya hpung shang ni, ginra komati ni, magam dap lit nga ni hte hpaga bungli madu ni shang lawm wa ai hpe chye lu ai.

Bawng ban hpawng hta ginra komati ni rai nga ai shingra sut gan hte makau grup yin hkang zing dap hkringmang Dr. Aung Win, Jinghpaw mung Engineer hpaji hpung ningbaw U Htun Htun Hlaing, sut hpaga hpaji ninghkring Slg. Mung Ring La hte Miwa-Myen hku hkau lam hkaja ai wa U Naw Htoi hte U Jan Hkung (sh) U Naw Hkung ni gaw masing hte seng ai hpaji hte seng ai lam ni hpe sang lang dan wa ai re hpe chye lu ai.

Shiga-Htu Seng

============================================================
Shiga yu mung chying mung masha ni hku nna tinang a grup yin hta byin nga ai mabyin masa ni, lak lai ai shiga ni, shiga sumpha laika ni hte ningmu ni hpe shana, shalai ya mayu ai rai yang Pajau Shiga page Massenger hku nna shing nrai [email protected] gmail ni hku nna matut mahkai shiga jaw la mai ai lam ndau shana dat ga ai. Pajau Media hku nna lawu kaw jaw da ai link ni mung shani shagu na shiga ni hpe hkap madat la mai sai lam n dau shana dat ga ai.

Telegram Link;-https://t.me/pajaumediachannelgenuinenews2023/12289

website ; https://www.pajau.net/

Gunrai Manu Rawt Nga Ai Majaw Myitkyina De Sa Shanu Nga Ai Mung Shawa Nkau Mayak Hkrum Nga Ai Lam

Pajau Media
7 May 2026.

Jinghpaw Mung na mare daju rai nga ai Myitkyina hta ndai hpang daw gunrai manu ni grai rawt nga ai hte nta shap manu ni ladu lai tsaw lung wa ai majaw laga shara hkan na sa shanu nga ai ni a matu yak hkak nga ai hpe chye lu ai.

2025 March shata kaw na hpang nna shara shagu na hpyen yen mung shawa law law shang wa ai zawn jawng sa lung ai ni, bungli galaw let sa shanu shingbyi nga ai ni mung Myitkyina law law nga ai re, ya na zawn gunrai manu ni tsaw lung wa ai, nta shap manu grau hpu wa ai, sau manu tsaw lung wa ai majaw tinang lu ai bungli shata kumhpa hte nlaw nla byin nna yak hkak hkrum sha ra taw hpe Hpakant kawn hpyen yen wa ai ramma langai tsun a kawn chye lu ai.

“Ndai kaw gaw lawu tsang bungli ni nnga ai gaw nre rai tim dai ni gaw sen 2/3 ram sha lu ai. Lu ai shata kumhpa hte nta shap shabrai, lu sha manu, hkawm sa manu ni hte nlaw ai. Anhte gaw hpyen yen ni re nga yang gaw nta masha ni mung bungli nlu shi ai i? nga san wa yang nta masha ni hpe nung myiman n-gwi madum wa” nga nna tsun dan ai re.

Myitkyina kaw gawk langai hta sen mi kaw na sen mi jan du hkra jaw ra nna, gawk mi masha lahkawng nga yang marai langai mun 7/8 nga nna, lawu tsang bungli shata kumhpa gaw sen 2 kaw na sen 2 mun 8 lapran sha nga ai hpe tsun dan ai re.

“Bungli kaw na nga shara, sha na ni lajang ya yang gaw loi hkyamsa ai. Laga shara kaw na sa ra ai masha ni na matu gaw nga/sha manu zeng nre yang tsep kawp nmai ai. Nga/sha manu zeng hte bungli sa galaw na nga yang mung sau manu gaw laja ai hte grai yak la ai” ngu hpang langai wa bai matut tsun ai re.

Dai majaw shani shagu hta hkan nna tsaw lung nga ai gunrai manu hte shani shagu jai lang ra ai matu shang grumhpraw law lang na matu lawu tsang bungli shabrai hpe yawng htum sen 5 ram lu yang she loi hkyam sa ai nga tsun dan ai re.

Myiykyina kaw gaw moi hkan e mun 8/9 ram sha nga ai n-gu buk mi hta ya ten daw sen mi jan du hkra nga wa nna, sau manu ni mung hkying 7 ram kaw na 13000ks du hkra tsaw lung nga ai re.

Moi kaw na gunrai manu hte sau manu ni tsaw lung nga ai sha n-ga sinpraw dingdung na mungdan majan a majaw jak sau manu mung yawm ai lam nnga ai sha matut na tsaw lung nga nna, lawu tsang bungli galaw sha taw ai ni a matu grai yak yak hkak hkak shakut nga pra ra taw hpe chye lu ai.

Shiga-Zau

============================================================
Shiga yu mung chying mung masha ni hku nna tinang a grup yin hta byin nga ai mabyin masa ni, lak lai ai shiga ni, shiga sumpha laika ni hte ningmu ni hpe shana, shalai ya mayu ai rai yang Pajau Shiga page Massenger hku nna shing nrai [email protected] gmail ni hku nna matut mahkai shiga jaw la mai ai lam ndau shana dat ga ai. Pajau Media hku nna lawu kaw jaw da ai link ni mung shani shagu na shiga ni hpe hkap madat la mai sai lam n dau shana dat ga ai.

Telegram Link;-https://t.me/pajaumediachannelgenuinenews2023/12284

website ; https://www.pajau.net/

Hpakant Lawnghkang Majan Matut Na Laja Nga Ai Lam

Pajau Media
7 May 2026.

Hpakant Lawnghkang mare maga de mani May 6 ya shana hkying 7 jan ram kaw na Myen Hpyen Dap hte KIA pawng hpawm dap ni myiman hkrum majan bai byin wa nna laknak kaba, laknak kaji nsen ni ding yang na lu taw hpe ginra masha ni kawn chye lu ai.

Mani hpawt hkan gap gasat nsen ni loi zim wa ai rai tim shana hkying 7 jan hpang daw laknak kaji kaba nsen ni bai na wa ai hpang hpyen hpung lahkawng hkrum majan byin wa ai re hpe chye lu ai.

Dai sha n-ga Hpakant tatma kawng kaw na mung laknak kaba ni majoi gap shadam karum wa ai hta, hkying 8 ram hta dum nta langai hta laknak kaba langai wa kapaw ai majaw mung shawa hkra hkala lam nga wa ai re.

Dai hte maren dai ni mung jahpawt grai jau hkying 6 kaw na laknak nsen ni, shada gap nsen ni na lu nga nna, tatma kawng shara kaw na mung laknak kaba gap shadam nga ding yang re hpe chye lu ai.

Shiga-Htu Seng

============================================================
Shiga yu mung chying mung masha ni hku nna tinang a grup yin hta byin nga ai mabyin masa ni, lak lai ai shiga ni, shiga sumpha laika ni hte ningmu ni hpe shana, shalai ya mayu ai rai yang Pajau Shiga page Massenger hku nna shing nrai [email protected] gmail ni hku nna matut mahkai shiga jaw la mai ai lam ndau shana dat ga ai. Pajau Media hku nna lawu kaw jaw da ai link ni mung shani shagu na shiga ni hpe hkap madat la mai sai lam n dau shana dat ga ai.

Telegram Link;-https://t.me/pajaumediachannelgenuinenews2023/12283?single

website ; https://www.pajau.net/

Myen Hpyen Dap Gaw Mawlu Hpe Zing Ngut Ai Hpang Namsi Awng Maga De Matut Na Htu Shadut Wa Ai Lam

Pajau Media
7 May 2026.

Myen Hpyen Dap gaw Indaw, Mawlu ginra hpe bai gasat zing lu ai hpang Myitkyina-Mandalay sa lam hta nga ai Namsi Awng mare de matut na hpyen htu shadut wa ai lam hpyen shi sawk ni kawn chye lu ai.

Myen Hpyen Dap gaw lai wa sai April shata kaw na Tigyaing-Kata lam hku na Indaw ginra maga de hpyen htu shadut gasat zing lu ai hpang ya ten hta Jinghpaw mung Monyin ginra Namsi Awng mare hte makau grup yin mare shara hkan hpyen shamu shamawt shara la nga ai hpe chye lu ai.

Namsi Awng mare de du taw nga ai hpyen hpung ni hpe hpyen dap hpe madi shadaw ai ginra masha nkau kawn hkap tau la ai lam hpe chye lu ai.

Myen Hpyen Dap gaw lai wa sai April shata 30 ya shani kaw na Indaw ginra hpe bai zing lu ai hpang deng (17) tsan ai Mawlu ginra hpe mung May (5) ya shani hpyen htu shadut shang gasat zing lu wa ai re.

Dai majaw Myitkyina-Mandalay sa lam hkan hta aten nlata lahkawng maga majan laja wa chye ai majaw dai lam hta hkawm sa ten hkan e sadi maja na hkawm sa na hpe mung shawa shada da sadi jaw tsun hkat nga ai lam hpe chye lu ai.

Shiga-Hpring

============================================================
Shiga yu mung chying mung masha ni hku nna tinang a grup yin hta byin nga ai mabyin masa ni, lak lai ai shiga ni, shiga sumpha laika ni hte ningmu ni hpe shana, shalai ya mayu ai rai yang Pajau Shiga page Massenger hku nna shing nrai [email protected] gmail ni hku nna matut mahkai shiga jaw la mai ai lam ndau shana dat ga ai. Pajau Media hku nna lawu kaw jaw da ai link ni mung shani shagu na shiga ni hpe hkap madat la mai sai lam n dau shana dat ga ai.

Telegram Link;-https://t.me/pajaumediachannelgenuinenews2023/12275?single

website ; https://www.pajau.net/

Lawnghkang Mare Hta Majan Laja Nga Ding Yang Re Lam.

Pajau Media
6 May 2026

Myen Hpyen Dap kawn hpyen n-gun law law hte Lawnghkang mare maga hpyen htu shadut shang wa ai majaw KIA masat (9) dap ba kawn ninghkap gasat ai hta lahkawng maga majan laja lana byin nga ai hpe chye lu ai.

Lepyin dap kaw na lung wa ai hpyen hpung ni gaw April praw (4) ya shani jahpawt hkying (5) jan aten kaw na Lawnghkang mare g*t kawng shara hta ninghkap gasat wa ai sha n-ga Lawnghkang tsi ring shara hta dap dung nga ai hpyen dap mung jahpawt hkying (7) kaw na ninghkap gasat wa ai lam chye lu ai.

Majan laja nga ten hpyen dap gaw Hpakant Tatma kawng kaw na mung masha ni shanu nga ai mare de MM (107) hte majoi gap shadam ai majaw Kade mare na mung shawa nga dum nta langai hta wa kapaw ai majaw mung shawa marai 3 hkala ai sha n-ga Lepyin mare hta mung wa kapaw nna dum nta langai hten wa ai hpe chye lu ai.

Rai tim dai ni gaw Hpakant ginra kata gap gasat nsen ni zim nga nna, lahkawng maga majan masa laja nga ding yang re. Lawnghkang ginra masha ni mung koi yen nga ai ni nga ai zawn nkau gaw mare kata pat hkrum taw nga ai hpe chye lu ai.

Shiga-Htu Seng

============================================================
Shiga yu mung chying mung masha ni hku nna tinang a grup yin hta byin nga ai mabyin masa ni, lak lai ai shiga ni, shiga sumpha laika ni hte ningmu ni hpe shana, shalai ya mayu ai rai yang Pajau Shiga page Massenger hku nna shing nrai [email protected] gmail ni hku nna matut mahkai shiga jaw la mai ai lam ndau shana dat ga ai. Pajau Media hku nna lawu kaw jaw da ai link ni mung shani shagu na shiga ni hpe hkap madat la mai sai lam n dau shana dat ga ai.

Telegram Link;-https://t.me/pajaumediachannelgenuinenews2023/12270?single

website ; https://www.pajau.net/

KIO Uphkang Ginra Kani Nanghpam Pat Jasan Ai Lam Galaw Nga

Pajau Media
6 May 2026.

KIO/KIA kawn kani nanghpam ninghkap komti ni hte pawng nna kani nanghpam san seng lam bungli galaw wa ai hta April shata laman nanghpam lu msha ni, kani nanghpam tsi hte lang rai ni law law hpe rim la nna hkang zing wa ai lam KIA shiga dap kawn ndau da ai re.

KIO uphkang ginra nkau hta kani nanghpam san seng lam bungli ni jawm galaw nga ten shata mi laman nanghpam dut mari shabra nga ai masha marai 8, Yama tsi (164), Kani hpraw sabya k**k 2 hte Yama htuk 2 hpe rim lu wa ai lam ndai da ai re.

Dai sha n-ga Uru ginra pat jasan komti ni hte pawng na mung Gwihka mare, Janmai bum, Sapawmaw mare, Yepying mare ginra hkan hta nanghpam ninghkap wa ai hta nanghpam mari dut shabra nga ai masha marai 7, Yama tsi (177), Kani hpraw sabya k**k kaju 5, Yama marawp pipe (27), Kani hpraw pipe (3). Laga nanghpam rai hte grumhpraw kaji kajaw hpe rim zing lu ai lam chye lu ai.

Masat 9 dap ba ginra hta lai wa sai April 25 ya (Kachin Anti Drug Day) hta mung Yama htuk kaju (67), Kani hpraw bu (3), sabya k**k (3), Methadone bu (3), Kani speed bu (3), Kani chyang joi mi hte laga nanghpam tsi ni hpe wan nat jahten wa ai lam hpe chye lu ai.

KIO/KIA gaw nanghpam tsi ninghkap ai hpe mung madung tawn galaw nga nna, nanghpam tsi ninghkap hpung (Pat Jasan) hpe gawde nna galaw nga ai re.

Shiga-Htu Seng

============================================================
Shiga yu mung chying mung masha ni hku nna tinang a grup yin hta byin nga ai mabyin masa ni, lak lai ai shiga ni, shiga sumpha laika ni hte ningmu ni hpe shana, shalai ya mayu ai rai yang Pajau Shiga page Massenger hku nna shing nrai [email protected] gmail ni hku nna matut mahkai shiga jaw la mai ai lam ndau shana dat ga ai. Pajau Media hku nna lawu kaw jaw da ai link ni mung shani shagu na shiga ni hpe hkap madat la mai sai lam n dau shana dat ga ai.

Telegram Link;-https://t.me/pajaumediachannelgenuinenews2023/12262

website ; https://www.pajau.net/

Majan Masa A Majaw Hpakant Ginra Gunrai Manu Rawt Nga Ai Lam.

Pajau Media
6 May 2026

Jinghpaw Mung Hpakant ginra hta majan matut laja nga nna Hpakant-Kamai lam hkawm sa ahkang pat kau ai majaw ginra kata gunrai manu ladu lai tsaw lung nga ai hpe ginra masha ni tsun ai kawn chye lu ai.

Hpyen masa a majaw Hpakant ginra rai htaw shalai madung lam re ai Kamai-Hpakant lam hpe shang lawt asuya KIA kawn hkawm sa ahkang hpe nhtoi masat lam nnga ai sha pat kau ai re.

Ya ten Gwihka- Indaw lam hku Hpakant ginra maga aten na na hkawm sa ra taw nna lam mayak a majaw gunrai manu tsaw lung nga ai hte Hpakant ginra kata n-gu, sau, jum, tsi mawan hte jak sau ni zawn re madung gunrai ni shang ai lam tsawmra yawm wa ai hpe gunrai hpaga ga ai ni kawn chye lu ai.

Dai majaw ya ten Hpakant ginra hta Wa shan joi mi 120000ks, U shan joi mi 100000ks, Udi langai 1500ks, Majap joi mi 30000ks, Shakau hpraw joi mi 18000ks, Shakau hkyen joi mi 10000ks, nga ai hpe chye lu ai. Dai sha n-ga jak sau manu mung liter mi hta 15000ks du hkra tsaw lung nga ai re.

Grau nna tsi mawan taw wa ai hta tsang ra wa nna aten galu ana zinli byin ai ni hte ma ni na matu karum shingtau lam ra taw lam, nhtoi na wa yang ginra kata hpaga lam hte shinggyim nga pra lam hta yak wa na hpe ginra masha ni tsang nga ai hpe chye lu ai.

Shiga-Hpring

============================================================
Shiga yu mung chying mung masha ni hku nna tinang a grup yin hta byin nga ai mabyin masa ni, lak lai ai shiga ni, shiga sumpha laika ni hte ningmu ni hpe shana, shalai ya mayu ai rai yang Pajau Shiga page Massenger hku nna shing nrai [email protected] gmail ni hku nna matut mahkai shiga jaw la mai ai lam ndau shana dat ga ai. Pajau Media hku nna lawu kaw jaw da ai link ni mung shani shagu na shiga ni hpe hkap madat la mai sai lam n dau shana dat ga ai.

Telegram Link;-https://t.me/pajaumediachannelgenuinenews2023/12261

website ; https://www.pajau.net/

Mawlu Muklum Hpe Hpyen Dap Bai Uphkang Lu Sai Lam

Pajau Media
5 May 2026.

Sagaing-Jinghpaw jarit shara rai nga ai Mawlu muklum hpe hpyen dap kawn bai uphkang lu sai lam chye lu ai.

Rawt malam hpyen hpung ni zing da ai Indaw ginra hpe lai wa sai April 30 ya shani hpyen dap kawn zing ai hpang Mawlu maga matut na hpyen htu shadut wa ai hta dai ni May praw 5 ya jahpawt daw kaw na Mawlu hpe uphkang lu sai lam chye lu ai.

Hpyen n-gun law law hte laknak kaba, drone law law hpe jai lang nna htu shadut wa ai Myen hpyen dap ni gaw mani May 4 ya shani Naba lai shara hta KIA hte PDF pawng hpawm hpung kawn gasat wa ai rai tim dai ni jahpawt daw hta rawt malam hpung kawn htingnut wa ra ai mat ai hpe chye lu ai.

Hpyen dap hpe madi shadaw ai Telegram channel ni rai nga ai (Mai Wai hte Kyaw Soe Oo ) channel hta mung Mawlu hpe hpyen dap kawn yawng uphkang da sai lam tang madun da ai hpe mu lu ai.

Myen hpyen dap Htu shadut wa ai a majaw Indaw, Manmaw lam hte Indaw Mawlu lam mayan kaw nga ai mare masha ni hpyen yen ra wa ai re.

Mawlu hpe 2023 ning December shara hta rawt malam hpung kawn zing uphkang lu ai lahkawng ning na ai hpang bai tat ra wa ai rai nga ai.

Shiga-Zau

============================================================
Shiga yu mung chying mung masha ni hku nna tinang a grup yin hta byin nga ai mabyin masa ni, lak lai ai shiga ni, shiga sumpha laika ni hte ningmu ni hpe shana, shalai ya mayu ai rai yang Pajau Shiga page Massenger hku nna shing nrai [email protected] gmail ni hku nna matut mahkai shiga jaw la mai ai lam ndau shana dat ga ai. Pajau Media hku nna lawu kaw jaw da ai link ni mung shani shagu na shiga ni hpe hkap madat la mai sai lam n dau shana dat ga ai.

Telegram Link;-https://t.me/pajaumediachannelgenuinenews2023/12242?single

website ; https://www.pajau.net/