Espace LIBRY By Babou

عسلامة صوحابي 😊 post ليوم spécial شوية، بعنوان ⚠️ رحلة الحياة، لعبة الحياة

من قوة الرحمة الإلهية 🙏

وقت يكون عندك موضوع شاغلك بالك، أو قصة قديمة مازالت معششة في مخك، أو ندم أو حسرة أو ألم في القلب.
تكون انت خرجت منها الحكاية، وأصبحت قديمة نوعا ما. يعني ليها مدة، ممكن شهور و ممكن أعوام.
و لكن المشاعر مازالت في قلبك.
⬆️ هذا كان الاطار،
تو بش نحكيلكم على🥳🥳 طريقة التصرف في مثل هذه الاوضاع

وقت يخلط الإنسان واعي بهذا الشعور المؤلم و يكون غير قادر على التجاوز.... كيما نقولو "الرجوع لربي"
يضرب خماسو في سداسو و يعرف إلي " الله على كل شيء قدير"

يتوجه الإنسان" بإرادة ووعي " و يسلم الأمر للقوى العليا، و يطلب من ربي بش يخفف عليه و إلا يعوضو ما خير .... و يكون صادق في نيتو... و يكمل يعيش على روحو عادي
المنهج هذا أو الطريقة تتطلب بعض الشروط، كيما
1.الإيمان بالله
2.الايمان بأن الله كل شيء قدير
3.و و الإيمان بأن الله أرحم الأرحمين

و في رحلة الحياة ( يعني في الايامات العادية) يجي نهار وتصير المعجزة.
فيعيش الانسان (موقف او تجربة) تنسيه في الألم القديم بصفة يجز العقل على تصورها.

💫ما تفيق بروحك كان الموضوع إلي كان مقلق مشى على روحو، لا وجود له لا في مخك و لا في قلبك 😜
اش صار ؟؟؟
إلي صار هو: وقت جاء التوقيت الإلهي باش الموضوع يختفي من حياتك، تتجلى و تتفعل إرادة ربي و تختفي و تزال كل المشاعر السيئة ( سواء كانت تعلق او ألم او فقدان الخ ) إلي إنت طلبت ربي يعاونك عليها ....
سبحان الله و بحمده.

مراحل التجربة تتلخص في🔽
الإدراك بالمشكل/الوضع/المشاعر
نية صادقة في طلب الاستعانة بالله
تسليم الموضوع لله والعيش في الحياة عادي
وتقبل وجود هذا الألم الداخلي
*( نتقبله في حياتي و أنا واعي إلي هو موجود في حياتي و لكن نفوضو لربي عز و جل، لأنني غير قادر على حل هذا المشكل)
إلى أن تتغير الاشياء في التوقيت الإلهي الأنسب لنا ⚠️
*الأنسب لنا وفق علم ربي، مش علمنا أحنا و تفكيرنا أحنا...
....رحلة الحياة، لعبة الحياة

"و هو على كل شيء قدير"
"و يشف صدور قوم مؤمنين"

✌️❤️ اتشارك معكم أفكاري من تجربتي في الحياة ...

هذا ال post ⚠️ بعنوان : حكايتي مع النوم 🙃🙃

مرة أخرى نقص النوم و النوم امخر يأثر عليا.
قبل كانتش فاهمه إلي فم علاقة بيناتهم.
ندور و ناكل، و عندي une envie de manger غير عادية... فم خلل quelques part
المرة هاذي فقت بيها الفازة و هاني شادة العسل

عندي مدة منحية السكر و العجين. ممكن جمعتين ولا أكثر. و بالطبيعة فرق كبير يكون على بدني بين كي ناكل السكريات و بين كي نكون بعيدة عليهم. فرق على الطاقة متاعي، على أفكاري، على شهواتي....

وقت نحكي على نوم مخر نقصد نوم بعد 2 و 3 متع الصباح. نوم عكس الساعة البيولوجية متع البدن.

بتجربتي نلاحظ فرق كبير بين الفترة الي نكون فيها نرقد مليح، يعني بكري ( بين العشرة و الحداش) و ساعات كافية (بين 7 و 8 سوايع)، الي نسميها النوم المنظم و بين الفترة الي" لأسباب مختلفة" يكون فيها النوم متاعي ماهوش منظم.

نلاحظ الفرق على قدرتي في تمالك نفسي مثلا قدام السكر، في الفترة المنظمة، السكر/ السكريات و الحلويات ما يقدروش يغريوني جملة. مايزعزعونيش. نكون ماخذه قراري إلي أنا ماناكلهمش و مانيش بش ناكل حتى كي يبدأو قدامي فوق الطاولة. بينما في الفترة الغير منظمة ... مايكونش عندي القدرة الكافية/ العزيمة و قوة اخذ القرار هذا. نضع بسهولة. و كان كليت مرة نوحل معاه نتعدي للبعدو و إلي بعدو ... و نرجع ناكل بصفة يومية لعديد المرات في اليوم. و يرجعني القلق الي يجيني من جرتو. الحاصيلو.

نلاحظ زادة مدى تأثير نقص النوم على هدوء اعصابي في المواقف الحساسة، كيما في نقاشات مع العايلة و إلا غير... في الفترة المنظمة نكون عندي قدرة و قوة على الهدوء ة تجاهل les futilités. بينما في الفترة الغير منظمة ممكن استفز بسهولة و ندخل في نقاشات ماكنهم فائدة.

نتعداو لموضوع التركيز، و ما أدراك ما التركيز. لسنين عديدة كنت عندي خلل تركيز في فترة المراهقة متاعي و حتى يعد. و كانت مقلقتني الحكاية و لكن ماكنتش فاهمة لا المشكلة و لا سبب المشكلة.

و تو بش نتعدا لموضوع les sauts d'humeurs.
باختصار، يعني وقت نتعداو من "حالة" نكونو لباس علينا و نحسو في رواحنا عادين و ماعنا شنوة مقلقنا الي "حالة" متقلقين، ماناش مرتاحين، ماناش في صحنا و حالة " chez pas ce que j'ai " ههههه
خلل جودة النوم و اكل السكريات سبب كبيييير وراء هذا المشكل و للأسف.

الحاصيلو، حبيت نتشارك معاكم الموضوع لأنو سنوات قليلة قبل ماكنتش على علم بكل هذه المعلومات، و الآن و الحمدلله جربتهم و تعديت بيهم و حسيت و استشعرت عديد النعم وقت نحترم قانون الساعة البيولوجية و نبعد على ماكلت السكريات (إلي قبل كنت محسوب مدمنة عليهم )

و بالمناسبة ال healthy lifestyle هذا بش يكون أساسي في الرحلات او السفرات القادمة معBabou إنشاءالله .
لا لشيء و أكن حتى نكونو المجموعة لكل في طاقه و ذبذبات جميلة

هوما محلاهم الاحتفالات و surtout الصيفية 😄واللمات و اللقاءات. و لكن نحاول في حياتي اليومية تكون "الفترة المنظمة " هي إلي نعيش بيها أكثر الوقت و يكونو "الفترات إلي ماهمش منظمين" قلال و بصفة نادرة...
المواظبة هي الأداة إلي نرجعو بيها لكل ثانية نحبو نتبعوها، حتى و كان نبعدو/نغلطو ، الحل يون ديما في التصليح.

بيزو les Zamy و إلي لقاء قريب 🙃✌️

هاذم تصاور من رمضان، انا و صديقتي التحفونة، كنا ندور في المدينة و نكملو في شوية قضيات قبل شقان الفطر، تعدينا بحذا la fameuse porte هاذي بحذا نهج الزيتونة، و وقفنا بش نعملو تصاور....
عاد فما راجل وقف يتفرج فينا، هوا أجنبى، من اليابان و في يدو مصورة. قالي ميسالش نصوركم؟؟ قتلو اي....
خذالنا زوز تصاور، حكيت معاه شوية، قالي مازالو نهارين و يسافر و حكالي إلي كان في الجنوب يكتشف، يزور و يصور. .... الحاصيلو، سألني كان انجمو نقعدو باتصال، ياخي بالطبيعة و كيما العادة عطيتو اسم الانستغرام متاعي و باي باي بسلامة

مبعد إكتشفت sur Instagram إلي السيد مصور بلحق. و إلي عندو موقع فيه برشا تصاور، يخدم برشا B&W و بالفعل قعد كل مدة يبعثلي مساج و يقلي على شعندو جديد و هو في أنا بلاد هههه الخ الخ


الموقف هاذا، و الا القصة هذي نحكي فيها ليوم علاش؟؟ 😁😁
الحقيقة بالنسبة ليا، التعرف على عباد جدد او التعرف على غرباء , حاجة enrichissante و ديما نعملها.
و في برشا وضعيات يبدى الي معايا يقلي منين تعرفو و إلا منين تعرفها بش تحكي معاه!!!

انا نحس روحي عادي علخر كي نحكي و ندخل في نقاشات مع عباد منعرفهمش. بالعكس غادي وين نشيخ ههههه
و نزيدكم، حتي كي نسافر، ندخل en contact فيسع فيسع مع العباد، في train, في ال hostel, في السوق .....

وينو المشكل كي تاخو و تعطي كلمة مع خلق ربي، لازم ديما نتقعدو نعرفو كان الاشخاص الي في الدائرة متاعنا؟؟
لازم نسكرو على رواحنا ؟
و كي يطلع فما تبادل أفكار نافع، ليك و إلا للطرف الاخر... علاش نحرمو رواحنا. علاش نعملو في نموسة لرواحنا و نتعاملو مع إلي مانعرفوهش كشخص يخوف؟؟
بلحق الاخر يخوف؟؟ و الا أفكارنا و إلي لقيناه من تجاربناو تجارب السابقين هوما إلي يخليونا نخافو 😜.

صحيح القاعدة الكونية 😁😁 عينك ميزانك، مش بش ترمي روحك علي يجي ههه و إلا علي يمشي لووول

ال" عملية هذي" ال هي "نحكي و نتعرف على الغرباء" في جرتها تعرفت على برشا أشخاص محلاهم و عشت قصص يعلم كان ربي قداش استنفع منهم..ّ و الحمدلله في أكثر الأوقات نطيح كان باولاد الحلال كيما نقولو

اي عاد، شقولكم في التصاور 😁😁😄❤️
المصور كان اسمو : Masahiko

بابو بكل حب أصدقائي و صديقاتي🙏
😜🤍🤍

نهاركم زين صوحابي😁😁 سامحوني اما ليوم باش نحكيلكم على "سنوات الضياع متاعي" 🤫

يا حسرة. أعوام تعداو من حياتي، انا سميتهم سنوات الضياع.
الحكاية عندها أكثر من 10 سنين لتالي ، كنت نعيش في monotonie. و إلا خليني نقول كنت نعيش في ركود.
لين وصلت فقدت الأمل كونو يجي نهار و حياتي تتبدل

وقتها كنت نقرأ في الجامعة، بعد ما عشت قصة " حب+تعلق+انفصال" مؤلمة في عمر المراهقة متاعي (كنت في عمر 16 سنا)
التجربة هاكي اثرت عليا برشا وانا صغيرة، خلاتني نحس الظلم. خلاتني نحس بتأنيب الضمير إلي أنا ماعرفت كيفاش نتصرف وقت كنت مغلوبة على أمري في برشا مواقف ....قلقتني ياسر غزرة لعباد ليا، بعد soit disant الفشل إلي تعديت بيه ....
و كبرت وحدها الحكاية في مخي، في قلبي و في حياتي....
النتيجة كانت الي انا وليت نعيش بلاش روح محسوب.
كنت نعتقد إلي التجارب الكل كيف كيف، و الي الخيارات في الدنيا محددة و كل واحد و شنوة كاتبو في الدنيا..... و برشا أفكار كيما الظلام.
كنت نعتقد إلي قد ما نعيش آلام من و مانحكيش عليهم و ما نوريهمش.... قد ما أنا قوية و كبيرة ..... و لكن هيهات ههههه
سنين تعداو و انا ماعاش أنجم نبكي، سنين تعاداو من غير حتى حاجة جديدة في حياتي، سنين تعداو و انا قالقة، الفرق الوحيد بين العاو و العام كان إلي أنا نتعدى من قسم الى قسم. و اقسم بالله لا اتطعمت حتى متعة متاع نجاح .....

ايا درا كيفاش حياتي بدأت تتبدل، بعد 5 سنين من ال MONOTONIE
هههههههه، بديت نعمل قرون هههه بديت نكذب على دارنا و بديت نعمل حاجات بالسرقة عليهم
بديت نخرج من التكرار إلي كنت نعيش فيه و نتعرف على عباد جدد، مش برشا اما فرق كبير
وين كنا و وين صبحنا.
سنوات الضياع متاعي دامو 5 سنين من عمري.

بعد أعوام عشت برشا تجارب أخرى... و مازالت نجرب و نزيد هههه و حمدالله

ليوم انا صحيح نادمة على كل لحظة تعدات عليا في سنوات الضياع متاعي و أنا ما استمتعتش فيها. و لكن :
انا ممتنة لكل لحظة و لكل مرة تالمت فيها و خسرت فيها وقت أكثر ملي يلزم. لا لشىء غير اني تعلمت انو كل شيء و كل حالة في الحياة ليست دايمة
الدوام من المحال.

اذا انت زادة ليوم تتعدى بمرحلة صعيبة و إلا خايبة في حياتك، خليها في مخك المعلومة، إلي حتى شيء ما يدوم، و إلي حتى موضوع في الدنيا مايستحق نبكيو عليه اعوام،
بركا كان نخفضو أهمية "اش يقولو علينا العباد" و "هاذا مش متاعنا" و "ياخي مهبولة انت؟؟" و "اعمل مخك فوقك و يزي بلا دلال زايد" .....

نحب نقول لروحي ليوم و للي يقراو معايا في ال POST هاذا:
هي الحياة نعيشوها مرة، خلينا نعيشوها كيما نحبو، خلينا نغلطو و نجربو، و نعاودو، و نلعبو، و نخسرو و نربحو ...... محسوب
الوقت ماشي بالطول ولا بالعرض، اصدم و اعما إلي في مخك و خايف منو سنين.

بكل حب بابو، من وحي تجربتي الخاصة❤️❤️