Fine-Colors Printing

مكالمة هاتفية بين الأم وابنها وهو على زورق الحرقة..
● ألوووو
يما... نطمنك ركبنا
والبابور عزم
أما نقلك يما وما تخبري باباي
بعد إللي شفتو اليوم من غصرات
كيني ركبني الندم

○ مستور يا ضنايا
وإن شا الله في طريقك ما تشوفش دوني
أما الندم يا نور ضي عيوني
بعد القضاء يولي مثيل عدم
هو قدر و مسطر
لا تندم على المكتوب لا تتكدر
ولا تخلي دمعة من شفرتك تحدر
ورأس ولدي غدوة شملنا يتلم

● زعمة آ يما
بعد القسا والهم تجلى الغمة
وبعد الضياع والذل نعمل همة
ونرجع راجل بالملا والفم

○ راجل يا كبدتي وسيد أندادك
لكن مللي ولدت والتعاسة زادك
والحال زايد عليه حال بلادك
أما بركة دعايا يجلى عليك الغم

● يما ...
كان تقدري خلصي القهواجي
عندو شهور في الخلاص يراجي
ماك تعرفيه ولد عيشة "الناجي"
وڨلو راو يشكرك م الڨلب مش م الفم
نوصيك يما وصية
عينك على خويا وعلى لوخية
غدوة إذا رجعت عامرين يديا
ما عاد يشوفو ولا تشوفي هم
نوصيك قولي لباباي يسامحني
غضبو عليا في الكنين جرحني
لكن نعرفو في غيبتي يمدحني
ولا يطيڨ فيا مسخرة ولا ذم
يما... يما... صوتك غاب نحسك عليا بعيدة
ما عدت نسمع كان الشهيق والتنهيدة
ظني بكيتي يا ساكنة لكبيدة
ماصابني بحذاك توا ثم

○ لا مانيش نبكي يا خو ممو العين
أما فراقك قاسمني نصين...
إنتم وين... ؟
وڨريبش طريقكم في البحر يتم

● ظلااااام آ يما ، لا ضو لا نجوم تلالي
كان البرڨ من بعيد يشالي
والريح والبحر موجا عالي
والشقف ريشة في هياج اليم

○ حمه... حمه..
يا كبدتي يا زينة شبيبة تونس
صوتك غبا يكونش كلاك اليم

-------------------> إنقطع الإتصال...😢

—————✧ منقول

بمناسبة عيد الإضحى المبارك تتمنى مطبعة الألوان الراقية لحرفائها الكرام عيد سعيد وأن يعيده اللّه عليكم بالخير والبركة
- كريم بن صالحة -