Talel Tazni

🔴 حاسيلو كملو فضفضو و فرغو قلوبكم و مش باش يتبدل شيء.. يوفى المونديال و يرجع كل واحد يضرب على جمعيتو في الميديا (كان جماعتنا خراوات متاع حياد قدام الميكرو) و بش تبقاو ل2030 بستاد واحد طاق الثاني متاعو يرعش بكلو و تنجم ما تترشحش للمونديال الجاي خاطر ترتيبكم في الأفريك ماشي بالتوالي و باش توليو تطيحو مع منتخبات قوية هي تمشي للمونديال و أحنا نتفرجو و إلي يحل فمو و يقول الحقيقة يشكيو بيه و يعملولو قضية كيدية بش يدرعولو خواطرو و يعدي 5 سنين من عمرو ماشي جاي على المحكمة
✅ فما حقيقة لازمك تراها كيما هي منغير ترهدين و تنوفيق، تونس اليوم ترتيبها 58 عالميا في التصنيف الجديد و مازال باش تزيد توخر في الترتيب بعد طرح هولندا و بصراحة أكثر تصنيف واقعي لمستوى كورتنا هو تصنيف الفيفا و كيف ما قلتلكم البارح سايي خرجنا من 10 أوائل في القارة يعني مرة جاية عادي جداً تلقى روحك تصفيات كاس عالم مع متصدر مجموعة كيف المغرب و إلا مصر و إلا سينيغال و إلا نيجيريا و إلا غانا ...يعني حتى كاس عالم تنجم معادش تترشحلو ...تستخايل باش نترباو؟ لا.. قانون جمعيات الرياضية باش يتبدل!؟ لا.. الجامعة يتنحى منها لوبي فاسد باش يتحط لوبي أفسد منو ...باش يبقى إعلام رياضي ناطق رسمي بإسم المستشهر إلي يدفع أكثر و بصاصة القهاوي عشاق البايين سبور بش يزيدو يتكاثرو و يعملو العار و يختارو هوما التشكيلة و شكون يلعب و يحكيو في كل شيء
🔴 أحنا باش نبقاو هكة لا تيرانات لا تكوين لا منتخب و زيد عليهم صحة رقعة و تمقعير على بعضنا بسبب و منغير سبب عالقليلة نكونو قراب شوية من مستوى جيراننا خاطر للأسف أحنا وخرنا ياسر و كل تظاهرة عالمية أو إفريقية تورينا عيوبنا و أحنا ساكتين.. تونس أكبر شركة أهلية لتسويق الفشل و محاربة الناجحين في جميع المجالات تحت غطاء نظرية المؤامرة و كي تعمل دورة صغيرة حتى في الشركات الخاصة و تشوف المناظر إلي يخدمو فيهم و تشوف البطالة إلي شادين الحيط تفهم البحث الكل
⬅️ تصبحون على غد أفضل، تصبحون على أمل أن يحمل الغد ما عجزنا عن تحقيقه اليوم 🇹🇳⚽
❤️🇦🇹
🔴⚪️💯