Wai Sitx Han

ကြိုက်တယ်ဆိုတာကလေ
မင်းသဘောကျတဲ့အချက်လေးသူ့မှာရှိနေလို့တဲ့။

ချစ်တယ်ဆိုတာကလေ
မင်းနှလုံးသားရဲ့တဒင်္ဂတောင်းဆိုမှုကြောင့်တဲ့။

မြတ်နိူးမိသွားရင်တော့လေ
သူဘာတွေပဲလုပ်ပါစေမင်းသဘောကျမယ်
ဘယ်လောက်ပဲဆိုးပါစေမင်းနှလုံးသားကလက်ခံမယ်
မင်းကိုလျစ်လျူရှုနေခဲ့ရင်တောင်
သူအဆင်ပြေသမျှမင်းပျော်နေမယ်
သူခက်ခဲရင်မင်းကြိတ်ပြီးဝမ်းနည်းမယ်
ဘာမှပြန်မရရင်လည်းပဲ
မင်းဟာကျေနပ်နေမှာပဲတဲ့။

သူနဲ့ပတ်သက်လာရင်
မင်းဟာဘယ်ခေါင်းစဉ်အောက်မှာပဲနေရပါစေ
ဘယ်ပြဌာန်းချက်တွေနဲ့ပဲဖော်ပြခံရပါစေ
ဘယ်လောက်ပဲသိမ်ငယ်အထီးကျန်နေရပါစေ
နောင်တမဲ့စွာနဲ့မြတ်နိူးနေတတ်လိမ့်မယ်တဲ့။

မင်းကိုလူတွေကဘာတွေပဲပြောကြပါစေ
မင်းအသိစိတ်မှာသူဟာအစဉ်အမြဲပါပဲ
မင်းရဲ့နေ့တွေမှာသူဟာရောင်နီပါပဲ
မင်းရဲ့ညတွေမှာသူဟာကြယ်ကလေးပါပဲ။

တကယ်မြတ်နိူးတတ်တဲ့လူတွေကလေ
ရယူခြင်းတွေဆိုတာကိုမေ့ထားတယ်
ပေးဆပ်ခြင်းတွေကိုလည်းဝါမကြွားဘူး။

သူ့ရဲ့အပြုံးဟာမင်းဘဝကြီး
သူ့အဆင်ပြေမှုတွေကမင်းအောင်မြင်မှုတဲ့။

ရလာဒ်ကိုမျှော်ကိုးပြီးဝင်မဖြေတဲ့စာမေးပွဲလိုပဲ
သူသိဖို့မလိုအပ်လောက်အောင်တိတ်တိတ်လေး
သူနားလည်ဖို့မလိုတဲ့ရှင်းပြခြင်းတွေလည်းမရှိ
မြတ်မြတ်နိူးနိူးလေးချစ်နေမိတဲ့မင်းရယ်ပါ။

မြတ်နိူးတယ်ဆိုတာကလေ
ဖြစ်တည်မှုတွေရဲ့လားရာတွေအတိုင်း
တုံ့ပြန်မှုတွေရဲ့ခံစားချက်တွေအတိုင်း
လျစ်လျူရှုမှုတွေရဲ့အထီးကျန်မှုတွေအတိုင်း
ချေမိုးမှုတွေရဲ့ကျန်နေရစ်မှုတွေအတိုင်း
လက်ခံကျေနပ်တတ်တဲ့ဖြူစင်မှုလေးအခြေခံပေါ့။

တကယ်တော့..
မြတ်နိူးမိတယ်ဆိုတာကလေ
မဖိတ်ခေါ်ပဲလာခဲ့တဲ့ခရီးသည်တစ်ဦးလိုပါပဲ
ဧည့်ဝတ်မပျူငှါခဲ့လည်း
ခိုနားခွင့်မတောင်းတဲ့သူရယ်ပါ
အဲဒီသံသရာခရီးကိုတော့
မြတ်မြတ်နိူးနိူးလေးဆက်လျှောက်နေဦးမှာတဲ့
မိုးတွေလည်းသည်းပါစေ
နှင်းတွေမစဲလည်းနေ
နွေကန္တရာလိုပူနေလည်းလေ…….။

ဝေစစ်ဟန်

သူနဲ့ပတ်သက်ရင်”အစွဲအလန်း”ထားတတ်တာမကြိုက်ဖူးလို့အမြဲပြောခဲ့ဖူးတယ်။
“အသည်းမာ”တတ်တဲ့အကြောင်းကိုတော့လမ်းခွဲတဲ့နေ့မှာသူတွေ့မြင်သွားခဲ့လိမ့်မယ်။
ဒါပေမယ့်…..
ဒီအရာတွေအားလုံး ကို့ဆီမှာတကယ်မရှိခဲ့တာတော့ဒီနေ့အထိသူမသိခဲ့လိုက်ဘူး။
နေ့စွဲတွေလည်းမှတ်မထားပါဘူး။
ဘဝအတွက်သူမရှိတော့ဘူးဆိုတဲ့အသိနဲ့တင်အကြိမ်ကြိမ်ပြိုလဲခဲ့ရပါတယ်။

ဝေစစ်ဟန်

ဆူးတွေကြောင့်မဟုတ်ဘူး
နှင်းဆီဖြစ်နေလို့သာငြိတွယ်ခဲ့ရသူပါ
မခြွေရက်၊မခူးရက်ခဲ့တဲ့ဘဝမှာ
ဝေးဝေးကလည်းမွှေးရနံ့နဲ့ကျေနပ်ပါတယ်….။

ဝေစစ်ဟန်

တချို့​တွေက​နေရာအသစ်မှာ​နေသားကျ​နေ​ပေမယ့်
တချို့​တွေက​နေရာအ​ဟောင်း​လေးထဲမှာ​နေသားကျနိူင်ဖို့​တောင်ကြိုးစား​နေရရှာတယ်
ကိုလည်းအဲဒီလိုပါပဲ​လေ......စံပယ်ပင်အိုခင်း​လေးထဲမှာ မင်းထားခဲ့တဲ့​နေရာ​လေးအတွက်ထွန်ယက်​နေတုန်း.....

ဝေစစ်ဟန်