MDIS Tashkent

Joriy yilning 29-aprel kuni Toshkentdagi Singapur menejmentni rivojlantirish institutida akademik jamoa ishtirokida 2025–2026 o‘quv yilining yakuniy yig‘ilishi muvaffaqiyatli yakunlandi. O‘quv yili davomida belgilangan vazifalar bosqichma-bosqich amalga oshirilib, barcha jarayonlar munosib tarzda yakuniga yetkazildi. Belgilangan muddatlar doirasida bajarilgan ishlar, olib borilgan faoliyat hamda erishilgan natijalar yil yakunining samarali o‘tganini yana bir bor tasdiqlaydi.

Shu boisdan, ustozlarimizga alohida minnatdorchilik bildiramiz. Ular yil davomida yuqori darajadagi professionallik, sabr-toqat va mas’uliyat bilan o‘z vazifalarini sidqidildan bajardilar. Akademik jamoamiz ta’lim berish, ilmiy faoliyat olib borish va kasbiy rivojlanishga qo‘shgan salmoqli hissalari uchun e’tirof etildi. Shuningdek, o‘qituvchilarimiz o‘quv jarayoni, ma’muriy vazifalar hamda shaxsiy faoliyatni samarali muvozanatda olib borishda yuqori mahorat namoyon etdilar.

Ta’kidlash joizki, o‘quv yilining muvaffaqiyatli yakuni munosabati bilan TSMRI rahbariyati tomonidan professor-o‘qituvchilarga minnatdorchilik sertifikatlari va esdalik sovg‘alari topshirildi. Bu — ularning fidokorona mehnati va yuksak natijalari uchun bildirilgan samimiy e’tirofdir. Hurmatli akademik jamoa, sizlarga samarali faoliyatingiz, mas’uliyatingiz va fidoyiligingiz uchun chuqur minnatdorchilik bildiramiz. Sizning mehnatingiz tahsinga loyiq va oliygohimiz rivojiga qo‘shayotgan hissangiz beqiyosdir.

Joriy yilning 24-aprel kuni Toshkentdagi Singapur menejmentni rivojlantirish institutida “Miss MDIST 2026” ko‘rik-tanlovi bo‘lib o‘tdi. Mazkur tadbir institut talaba-qizlarining intellektual salohiyati, ijtimoiy faolligi hamda ijodiy qobiliyatlarini namoyon etish maqsadida tashkil etildi. Tanlovda eng sara talaba-qizlar ishtirok etib, jami 7 ta shart bo‘yicha o‘zaro bellashdilar.

Ko‘rik-tanlov doirasida ishtirokchilar sahna madaniyati, nutq mahorati, bilim darajasi hamda ijodiy yondashuv kabi yo‘nalishlarda o‘z salohiyatlarini namoyish etdilar.
Tadbirda Singapur xalqaro maktabi o‘quvchilari, Chilonzor tumani 131-son umumta’lim maktabi o‘quvchilari, Chilonzor tumani hokimligi vakillari hamda O‘zbekiston Liberal-demokratik partiyasi (O‘zLiDeP) xodimlari faxriy mehmon sifatida ishtirok etdilar.

“Miss MDIST 2026” ko‘rik-tanlovi yoshlarning ijtimoiy faolligini oshirish, ularning iqtidorini qo‘llab-quvvatlash hamda ma’naviy-estetik dunyoqarashini yuksaltirishga xizmat qiladigan muhim madaniy tadbirlardan biri bo‘ldi hamda g‘oliblar qimmatbaho sovg‘alar bilan taqdirlanishdi.