Blog By K

ဗီယက်နမ်မြောက်ပိုင်းက ဗီယက်နမ်ရဲ့မြို့တော် ဟနွိုင်း 🇻🇳

ဒီတစ်ခါတော့ ခွန်း က သမိုင်းကြောင်းတွေ၊ ယဉ်ကျေးမှုတွေနဲ့ သဘာဝအလှတရားတွေ စုဝေးနေတဲ့ ဗီယက်နမ်နိုင်ငံမြောက်ပိုင်းကို အလည်အပတ်သွားမယ့်သူတွေအတွက် အနည်းငယ်ပြောပြပေးချင်ပါတယ်...ဗီယက်နမ်ဟာ မြောက်ပိုင်း၊ အလယ်ပိုင်းနဲ့ တောင်ပိုင်းဆိုပြီး လည်စရာအဓိက Region 3ခုရှိပါတယ်။

ဗီယက်နမ် ဟနွိုင်းမြို့ဆိုတာ ...
ဗီယက်နမ်မြောက်ပိုင်းဟာ နှစ်ထောင်ချီတဲ့ သမိုင်းကြောင်းတွေ၊ ပြင်သစ်ကိုလိုနီခေတ် လက်ရာအဆောက်အအုံတွေနဲ့ ဗီယက်နမ် ရိုးရာယဉ်ကျေးမှုတွေ ပေါင်းစပ်ရှင်သန်နေတဲ့ နေရာပါ။ ဒါ့အပြင် ကမ္ဘာ့အမွေအနှစ် နေရာတွေနဲ့ တောင်တန်းတွေရဲ့ ရင်သပ်ရှုမောဖွယ် အလှတရားတွေကြောင့် လက်ရှိအချိန်မှာ ကမ္ဘာတစ်ဝှမ်းက ခရီးသွားတွေ အများဆုံး လာရောက်လည်ပတ်ကြတာ ဖြစ်ပါတယ်။

မြောက်ပိုင်းဒေသကြီး တစ်ခုလုံးဟာ မြောက်ဘက်မှာ တရုတ်နိုင်ငံ၊ အနောက်ဘက်မှာ လာအိုနိုင်ငံတို့နဲ့ နယ်နိမိတ် ထိစပ်နေပြီး ဆောင်းရာသီဆိုအရမ်းအေးတဲ့နေရာဒေသဖြစ်ပါတယ်။

ဘယ်မြို့တွေသွားသင့်လဲ? (ဘယ်နှစ်ရက်နေသင့်လဲ)
၁။ Hanoi (ဟနွိုင်းမြို့) 🇻🇳 - (၂ ရက်ခွဲခန့်)
ဗီယက်နမ်ရဲ့ မြို့တော်ဖြစ်တဲ့ ဟနွိုင်းဟာ အလယ်ပိုင်း၊ တောင်ပိုင်း မြို့ကြီးတွေနဲ့ အရမ်းကွာခြားပါတယ်။ ခေတ်မီမိုးမျှော်တိုက်တွေချည်းပဲရှိတဲ့ မြို့ပြပုံစံထက် ရှေးဟောင်းအငွေ့အသက်တွေနဲ့ ရိုးရာယဉ်ကျေးမှုတွေကို ပိုပြီး ခံစားရမယ့် မြို့ပါ။ မြို့ဟောင်း (Old Quarter) လမ်းမတွေ၊ Hoan Kiem ရေကန်၊ Temple of Literature (စာပေဗိမာန်), ဟိုချီမင်းဂူဗိမာန်၊ Ho Tay (West Lake) နဲ့ နာမည်ကြီး Train Street တို့ကို မဖြစ်မနေ သွားလည်သင့်ပါတယ်။ တခြားနေရာတွေလည်းရှိပါသေးတယ်။

ဟနွိုင်းက လူတွေဟာ ကျန်းမာရေးကို အရမ်းလိုက်စားကြပြီး ပန်းခြံတွေမှာ လေ့ကျင့်ခန်းလုပ်သူတွေနဲ့ အမြဲစည်ကားနေတတ်ပါတယ်။ အစားအသောက်တွေကလည်း အသီးအရွက် လတ်လတ်ဆတ်ဆတ်တွေကို အဓိကထားတဲ့ Healthy Food တွေဖြစ်လို့ ကျန်းမာရေးနဲ့ ညီညွတ်ပါတယ်။ Halal-friendly အတွက် Vegan ဆိုင်တွေလည်းပေါပါတယ်။

လမ်းတွေပေါ်မှာ ဆိုင်ကယ်တွေ အလွန်ပေါများလွန်းတာကလည်း ဟနွိုင်းရဲ့ ထူးခြားတဲ့ မြင်ကွင်းတစ်ခုပါ။ ရိုးရာယဉ်ကျေးမှု အစစ်အမှန်နဲ့ ဒေသခံ အစားအသောက်တွေကို အဓိက ထိတွေ့ခံစားချင်တယ်ဆိုရင်တော့ ဟနွိုင်းက အကောင်းဆုံး ရွေးချယ်မှုပါပဲ။

၂။ Sapa (ဆာပါ) - (၂ ရက် မှ ၃ ရက်)

ဟနွိုင်းကနေ ညဘက် Sleeper Bus စီးပြီးအေးအေးလူလူအိပ်ပြီးလိုက်သွားရင် မနက်အစော ၅-၆ နာရီဆိုရင် ဆာပါမြို့လေးကိုရောက်ပါပြီ။

ဆာပါဆိုတာ အေးချမ်းလှပတဲ့ တောင်ပေါ်မြို့လေးရဲ့ အလှတရားတွေကို ခံစားဖို့ အကောင်းဆုံးနေရာပါ။ Indochina ကျွန်းဆွယ်မှာ အမြင့်ဆုံးတောင်ထိပ်ဖြစ်တဲ့ Fansipan (ဖန်ဆီပန်) ကို Cable Car စီးပြီး သွားရောက်နိုင်ပါတယ်။ ဒါ့အပြင် တိုင်းရင်းသားတွေရဲ့ ရိုးရာယဉ်ကျေးမှုနဲ့ ရေတံခွန်လည်းရှိတဲ့ Cat Cat Village ကိုလည်း မဖြစ်မနေ သွားလည်သင့်ပါတယ်။ ဆာပါမြို့လေးထဲမှာ လမ်းလျှောက်ရင်း တိမ်ပင်လယ်ကို ငေးကြည့်လို့ရတဲ့ View လှလှ ကော်ဖီဆိုင် (Cafe) လေးတွေ အများကြီးရှိလို့ ကော်ဖီလေးသောက်ရင်း အေးအေးဆေးဆေး အနားယူလို့ အရမ်းကောင်းပါတယ်။ ကောင်းကောင်းအနားယူချင်သူတွေအတွက်ဆို Resort ကောင်းလေးတွေလည်းအများကြီးပါပဲ။ ဒါ့အပြင်အချိန်ရခဲ့ရင် Glass Bridge လည်းသွားနိုင်ပါသေးတယ်။

၃။ Halong Bay (ဟာလောင်းဘေး) - (Day Trip)
World Wonder 7 စာရင်းဝင်သလို၊ UNESCO ကမ္ဘာ့အမွေအနှစ်နေရာလည်း ဖြစ်ပါတယ်။ ဟနွိုင်းကနေ မနက်သွား ညနေပြန် Day Trip သွားဖို့ အရမ်းသင့်တော်ပါတယ်။ ထုံးကျောက်တောင်တွေကြား Cruise သင်္ဘောစီးရင်း အနားယူမယ်၊ (Kayaking) လှော်မယ်ဆိုရင် အကောင်းဆုံးပါပဲ။ Day trip မှာဆို Ticket ဝယ်ရုံနဲ့ အသွားအပြန်ပို့ဆောင်ရေးအပြင် နေ့လည်စာ Buffet ပါ ပါပါသေးတယ်။ မနက် ၇ လောက်သွားပြီး ည ၈ခွဲလောက်ဆို ဟနွိုင်းကိုပြန်ရောက်ပါပြီ။

၄။ Ninh Binh (နင်ဘင်) - (Day Trip)
ကုန်းတွင်းပိုင်း ဟာလောင်းဘေးလို့ တင်စားကြတဲ့ နင်ဘင်ဟာလည်း UNESCO ဝင်ထားတဲ့ နေရာတစ်ခုပါ။ ဟနွိုင်းကနေ Day Trip အနေနဲ့ သွားဖို့ အရမ်းအဆင်ပြေပါတယ်။ လှေငယ်လေးတွေစီးပြီး ဂူတွေ၊ ဘုရားကျောင်းတွေနဲ့ သဘာဝအလှတရားတွေကြား ဖြတ်သန်းသွားလာရမှာပါ။

ရာသီဥတုနဲ့ သွားလည်သင့်တဲ့အချိန် (Best Time to Visit) 🇻🇳
ဗီယက်နမ်မြောက်ပိုင်းရဲ့ ရာသီဥတုက အလယ်ပိုင်း တောင်ပိုင်းနဲ့မတူဘဲ နွေ၊ မိုး၊ ဆောင်း၊ နွေဦး ဆိုပြီး ရာသီဥတု (၄) မျိုး ကွဲပြားပါတယ်။ ဆောင်းရာသီ (ဒီဇင်ဘာ-မတ်လခန့်) မှာ တော်တော်လေး အေးမြပြီး ဆာပါမှာဆိုအရမ်းအေးတတ်ပါတယ်။ ဆောင်းတွင်းဆို 10-20C လောက်ထိရှိပြီး SaPa ဆို 3-10C လောက်ထိရှိတတ်ပါတယ်....

နွေရာသီကတော့ ပူပြီး မိုးရွာတတ်ပါတယ်။ ဒါကြောင့် အကောင်းဆုံး သွားရောက်လည်ပတ်သင့်တဲ့ အချိန်တွေကတော့ ရာသီဥတု သာယာတဲ့ နွေဦးရာသီ မတ်လမှ မေလ (Mar - May)နဲ့ ဆောင်းဦးရာသီ စက်တင်ဘာလမှ နိုဝင်ဘာလ (Sep - Nov)အတွင်း ဖြစ်ပါတယ်။ ပေါ့ပေါ့ပါးပါး အဝတ်အစားတွေ၊ လမ်းလျှောက်ရ အဆင်ပြေမယ့် ဖိနပ်နဲ့ ကင်မရာတစ်လုံး ပါဖို့တော့ လိုမယ်နော်။ ဆောင်းတွင်းဆို ဓါတ်ဖမ်းဖို့အနွေးထည်ထူထူတွေလက်အိတ်တွေ လိုပါတယ်နော်။ နောက်တစ်ခုက မိုးတွင်းနဲ့ဆောင်းမတိုင်ခင်မှာ မုန်တိုင်းခဏခဏရှိတတ်တာမို့ ရာသီဥတုအမြဲစစ်ဖို့လိုပါတယ်နော်...

ဘာတွေ စားသင့်လဲ?
မြောက်ပိုင်းအစားအစာတွေက အရသာပိုမို ရှင်းလင်းပြီး ဆန်ခေါက်ဆွဲကို အခြေခံတာများပါတယ်။
Phở (ဖာ)- နာမည်ကြီး ဗီယက်နမ် ရိုးရာခေါက်ဆွဲ
Bún chả (ဘွန်ချာ)- ဝက်သားကင်နဲ့ စားရတဲ့ ခေါက်ဆွဲ
Bánh mì (ဘန်မီ) - ဗီယက်နမ် အသားပေါင်မုန့်ညှပ်
Coffee (ကော်ဖီ) - ဗီယက်နမ်ကော်ဖီက ကမ္ဘာကျော်ပါတယ်။ အထူးသဖြင့် ဟနွိုင်းမှာ နာမည်ကြီးတဲ့ ကြက်ဥကော်ဖီ (Egg Coffee)၊ အုန်းသီးကော်ဖီ (Coconut Coffee)၊ Yogurt Coffee နဲ့ Salty Coffee တွေကို ကော်ဖီဆိုင်လေးတွေမှာ ထိုင်ရင်း မဖြစ်မနေ မြည်းစမ်းကြည့်သင့်ပါတယ်။ ခလုတ်တိုက်ရင်တောင် Coffee ဆိုင်တွေ့တဲ့မြို့ပါ...

ဗီယက်နမ်အစားအစာတွေက ပေါ့ပြီးဆီမများပါဘူး ဒါကြောင့်မြန်မာတွေပါးစပ်နဲ့ဆို အရသာမရှိဘူး၊ မစားတတ်ကြဘူးဖြစ်တတ်ပါတယ်။ မပူပါနဲ့ တစ်ခုခုစားရင် အချဉ် (သံပုရာသီး) နဲ့ ငရုတ်သီးတောင်းပါ၊ ဆိုင်တိုင်းမှာရှိတတ်ပါတယ်။ ဒါဆိုခေါက်ဆွဲစားရင်တောင် မြန်မာအကြိုက်ချဉ်ချဉ်စပ်စပ် စားလို့ရပါတယ်နော်။ တကယ်လို့ လုံးဝကိုမှမစားတတ်ရင်လည်း Shopping center တွေမှာ တခြားအစားအစာဆိုင် Japan, Thai, ကြက်ကြော် အစရှိသဖြင့်ရွေးချယ်စားသောက်လို့ရပါတယ်။ ဒါမယ့်ရောက်တုန်းရောက်ခိုက် Local food ပဲစားဖို့ တိုက်တွန်းချင်ပါတယ်ခင်ဗျာ....

သယ်ယူပို့ဆောင်ရေးနဲ့ ငွေကြေး 💴
အသုံးပြုရမယ့် ငွေကြေးကတော့ ဗီယက်နမ်ဒေါင် (VND) ဖြစ်ပါတယ်။ ငွေကြေးဖောင်းပွတာထက် ကိန်းဂဏန်းပမာဏအများကြီးကိုင်သုံးရပါတယ်။ ခန့်မှန်းခြေ မြန်မာငွေ 1ကျပ်ကို ဗီယက်နမ်ငွေ 6VND နဲ့ညီမျှပြီး ဗီယက်နမ်ရောက်ရင် မီလီယံနာဖြစ်နိုင်ပါတယ်နော် 😅 USD ဆိုရင်တော့ 100USD ကို 2,600,000 VND (2.6M) ဝန်းကျင်ရပါတယ်။

မြို့တွင်း သွားလာဖို့အတွက် လမ်းလျှောက်တာ၊ Grab ဆိုင်ကယ်/ကား, Private ကားငှားတာကို အလွယ်တကူ ငှားရမ်းအသုံးပြုနိုင်ပါတယ်။

🔴 တစ်ခုသတိထားရမှာက ဗီယက်နမ်အများစုက အင်္ဂလိပ်စာမကောင်းကြပါဘူး ခေတ်ပညာတတ်လူငယ်တွေကလွဲလို့ အသက်ကြီးပိုင်းအတော်များများက မပြောနိုင်ပါဘူး၊ ပြောရင်လည်း Broken လောက်ပြောမှနားလည်တတ်ပါတယ်။ Tourist destination spot နေရာတွေကတော့အများစုပြောနိုင်ကြပါတယ်။
🔴 ဗီယက်နမ်တွေက ရုပ်တည်ပြီး စကားပြောကျယ်တဲ့အတွက် စစချင်းမှာတော့ သဘောမကောင်းဘူး ရိုင်းတယ်ထင်ရပေမယ့် ဒါဟာသူတို့ရဲ့လူနေမှုပုံစံဖြစ်တဲ့အတွက် စိုးရိမ်စရာမလိုပါဘူး ရင်နှီးသွားရင် စိတ်ထားကောင်းကြတာ ခံစားမိမှာပါ ဒီအချက်လေးတွေကလွဲလို့ မြန်မာတွေအပေါ်မှာ ဗီယက်နမ်တွေက ပုံမှန်နိုင်ငံခြားသားတစ်ယောက်လို့သာ မြင်တာဖြစ်တဲ့အတွက် အတော်လေးအဆင်ပြေပါတယ်။ ခင်မင်ရင်းနှီးသွားရင်အရမ်းကိုမှ ကူညီရိုင်းပင်းတတ်ကြပါသေးတယ်။

ကဲ ဒါဆိုရင်တော့ အပေါ်မှာပြောပြခဲ့တဲ့ဒီအချက်အလက်လေးတွေက ဗီယက်နမ်မြောက်ပိုင်းကို သွားလည်မယ့်သူတွေအတွက် အများကြီး အထောက်အကူဖြစ်မယ်လို့ မျှော်လင့်ပါတယ်။

မြောက်ပိုင်းလာချင်တဲ့သူတွေ အသေးစိတ် သိချင်တာလေးတွေ ရှိရင် အချိန်မရွေး ကူညီပေးဖို့ အသင့်ရှိပါတယ်ခင်ဗျာ။ Ticket တွေလည်းခွန်းကိုမေးလို့ရပါတယ်နော်....