CYNTHIA STORIES

*ISIHLALO SOBUKHOSI*
*CYNTHIA S NDLOVU*
*ISAHLUKO 5*

Sekwedlule iviki uNkosiyabo wasetshenzwa nguNkoviyo . Lamhla uthe evuka wahamba labafana ekuchakiseni inkomo . Usemangele uNkosiyabo phela wonke umuntu abahlangana laye umbingelela ngenhlonipho enkulu , njalo nxa bembingelela amakhanjana abo bawagebhela phansi okutshengisa ukuthi bayamhlonipha kakhulu .
Ahlale esigodweni sesihlahla amamatheke kakhulu , phela useyibona imsebenzi kaNkoviyo , njalo usejabuliswe yinhlonipho ayitholayo lamuhla .
Asukume phansi njalo , ahamba hambe , usezizwa eyinkosi elamandla into nje kasakwazi ukulinda kufike usuku azagcotshwa ngalo khona ezathatha izihlalo sobukhosi akhokhelele abantu .

"Bafana , sengibuyela ekhaya mina , lingaqeda libuye lazo inkomo ." Kusitsho uNkosiyabo, phela kasayenelisi ukulinda ayefika ekhaya khona ezabikela unina . Omunye wabaqaphi amlandele emuva njengokuba bayalelwa ukuthi owasebukhosini engahambi yedwa bekhona , phela abasebukhosini abaphephanga emphakathini ngokunjalo kumele bahlale beqatshiwe ngelokhozi.
Ubukhosi buyabangwa , banengi abadliwa ngumhlabathi befela bona ubukhosi yingakho kufanele bahlale belindiwe njalo nje ikakhulu abesilisa . Isitha siyabe sikwazi ukuthi singaqeda ngabesilisa , ubukhosi kuyabe sekufanele budluliselwe komunye womdeni a***e abantu , ngoba ngokwesintu abasifazane abavunyelwa ukuhlala esihlalweni sobukhosi kanye lokubusa . Abesifazane okwabo yikuthobela kanye lokuyandisa umdeni .

Uhambela phezulu uNkosiyabo, ahlangana labo endleleni bambingelela ngenkulu inhlonipho. Ethi ngokufika ekhaya ahlangane lo Sibonelo esangweni engena , kodwa amangale phela ubekhangelele ukuthi uSibonelo laye uzambingelela ngenhlonipho kodwa ubonakala engelandaba laye .

"Usuhlala ngaphi vele wena ? Ukwenza kwakho kuyasolisa ." Kususa uNkosiyabo.

"Unjani lawe Nkosiyabo, ngiyabona ukuthi ukhohlwe ukubingelela . Ukwenza kwami kusolisa ngani ?" Abuze ngomoya ophansi uSibonelo .

"Sewahlala ungekho lapha ekhaya okuyinto entsha leyo , usuhamba izinyanga angithi ?" Abuze uNkosiyabo emkhombela ngendukwana yakhe esiphaqeni , ahleke uSibonelo.

"Uyangihlolela Nkosi , uchaza ukuthi awukwazi ukuthi ngiyasebenza mina ? Njengoba ungibona ngigqoke umfaniswana wekontilaki uthi ngivela giya ."

"Mhlawumbe uzigqokele nje ukulahlisa umumo . Lalela ngikutshele Sibonelo , loba ungazihamba inyanga uyenze konke okufisayo awusoze uphumelele enhlelweni zakho , ngikukhangele ." Atsho lawo uNkosiyabo aqede ahambe etshiya uSibonelo eceleni kwesango , ahleke uSibonelo aqede aqonde kwelakhe igumbi .

"Minenhle , ngidinga indlovukazi yalapha ekhaya ." UNkosiyabo ebuza udadewabo emthola emkulwini.

"Umama ,usekamelweni lakhe , ungathanda ngiyekubizela yena ?" Abuze esukuma phansi uMinenhle , anqekuze ikhanda uNkosiyabo aqede adonse isiqobane ahlale phansi , uMinenhle yena aphume ayebiza unina , ngemva kwemizuzwana bangene belandelana emkulwini.

"Kuthwa uyangidinga Nkosi , ngabe konke kuhamba kuhle nkosana yami ?" Abuze uMaMpofu ehlala phansi.

"Kulodaba engifisa siluhlafune sibabili ."

"Kulungile ngilandele ." Atsho ephuma emkulwini uMaMpofu , amlandele ngemva uNkosiyabo bahambe bayebhoda ngesiphala ,bame ebhakaseni bekhangele emasimini .

"Ngilesiqiniseko akula oseduzane , kodwa ungakhulumeli phezulu ." Kusitsho uMaMpofu ngemva lokuthalaza nxa zonke , phela konke abakwenzayo bakwenza ngemfihlo , kafuni abekhona ozananzelela ufuna abantu bakholwe ukuthi uNkosiyabo ukhethwe ngabaphansi ukuthi abe yinkosi yaMakhalima .

"Uyasebenza umuthi kaNkoviyo , ngiphume labafana ekuseni besiya ekuchakiseni inkomo , inhlonipho engiyiphiwe ngabantu lamuhla ingimangazile . Ndlovukazi, ngithi wonke umuntu ebengihlangana laye ubengibingelela ikhanjana lakhe eligebhele phansi , mama ngiyesabeka mina emphakathini , sebevele bangivuma abantu ." Akhulume ngenjabulo enkulu uNkosiyabo, athokoze uMaMpofu .

"Uyabona ke , uphekekile mfanami hayi ubugwala lobuyana obungitshengisa bona . Lokhu kuyatshengisa ukuthi usuyindoda emadodeni , inkosi uqobo lwayo , osekusele nje yikuthi ugcotshwe ."

"Lami angisayenelisi ukulinda . Kodwa nxa ucabanga mama ugcobo luzakuba khona nini ?" Abuze uNkosiyabo, aqale ngokuthalaza njalo uMaMpofu kwazise kafuni ukwenza lona iphutha .

"Asilinde kancane kudlule umsebenzi kayihlo , singajaha kakhulu bazaze bananzelele ukuthi kukhona esikwenzayo . Lalela Bhebhe , wena lwela ukunqoba inhliziyo zabantu balapha esigabeni, uvakatshele abafelwakazi lezintandane ubaphathela okudliwayo khona bezakuvuma babone ukuthi wena ungcono kulo Sibonelo kanye lo Busani . Ngokwenza lokho Nkosi, bazakuthanda futhi bafune wena ube yinkosi yabo ." Anqekuze ikhanda uNkosiyabo.

"Ngiyakuvuma Ndlovukazi, ngizakwenza njalo , vele bazangivuma."
Amamatheke uMaMpofu aqede avalelise uNkosiyabo abuyele ekamelweni lakhe .

Emkulwini kaMaMoyo , uhleli lo Sibonelo, lamhla utshone ekhona kulilanga lakhe lokuphumula .
Asuse uMaMoyo ."Ngizwe udadewenu esithi usuzimisele ngokuthatha ikhosikazi, ngeyangaphi intombi ?"

Ahleke uSibonelo ,"Bengisazi vele ukuthi uPhilile uzazithwala indaba zami . Yebo sengifisa kodwa angikamtholi umaqondana , ukhona yena esengike ngamuthi tshazi khonapha esigabeni ."

"Kuhle , usukhulile vele Sibonelo , sekufanele uqalise umdeni wakho ,ungabe usadlalisa isikhathi nxa inhliziyo yakho ivuma ukuthi nguye kangene ekhaya umakoti ."

"Ngiyabonga mama , njengoba ngizabe ngikhona nje impelasonto yonke ngizazama ukumzingela ngimbikele okusenhliziyweni yami."

"Ngeyangaphi intombi ?" Abuze uMaMoyo.

"Uzalwa koGatsheni laphana phetsheya komfula ."

"KoGatsheni kulentombi ezimbili , kulesicino sika Gatsheni uSandile kanye lomzukulu wakhe , kodwa phela umzukulu wakhe uqede nyakenye izifundo zakhe zaphezulu ."

"Ngu Sandile mama engikhuluma ngaye ."

"Ubonakala engumntwana olembeko sibili uSandile , nxa engowakho labaphansi bazakukhokhelela ." UMaMoyo ekhwezela umlilo .
Baxoxa nje uMaMpofu umile ngemva komkulu , ulalele yonke inkulumo yabo . Asuke ngokuphangisa atsh*tshe eqonda ekamelweni likaNkosiyabo , athalaze ngapha langapha aqede athi ntshobe ngokuphangisa .

"Mama wangena utsh*tsha kwenzenjani ?" Abuze uNkosiyabo evuka ethaleni .

"Ngikubonele umakoti , phela nxa uzagcotshwa kufanele ube usuthethe umfazi ."

"Ngike ngacabanga ngakho mama , kodwa kubi ngoba bengingakamboni ongangifanela lapha esigabeni ."

"Ukhona engikubonele yena , ibizo lakhe ngu Sandile isicino sika Gatsheni phetsheya komfula ."

Iyaqhubeka